کراچی : پاکستان پیپلزپارٹی کے چیئرمین بلاول بھٹو زرداری نے پورٹ قاسم کے احتجاج کرنے والے ڈاک مزدوروں سے اظہار یکجہتی کرتے ہوئے وفاقی حکومت سے کہا ہے کہ پورٹ قاسم کی برتھوں کی نجکاری روکی جائے ۔
پیپلزپارٹی مزدوروں کے جائز حقوق غصب کرنے کی اجازت نہیں دے گی، بلاول ہاؤس سے جاری کردہ بیان میں چیئرمین بلاول بھٹو زرداری نے کہا کہ نواز شریف حکومت مزدور طبقے سے ذریعہ معاش چھیننے پر تلی ہوئی ہے اور تمام منافع بخش اثاثے اپنی پارٹی کی بزنس برانچز کو بیچ رہی ہے۔
پاکستان پیپلزپارٹی نواز حکومت کی ان حرکتوں کو برداشت نہیں کرے گی اور مزدوروں کی جائز احتجاجی تحریک میں ان کے ساتھ رہے گی۔
چیئرمین بلاول بھٹو زرداری نے مزید کہا کہ پیپلزپارٹی کو یہ اعزاز حاصل ہے کہ اس نے لیبر اصلاحات کے ذریعے مزدور طبقے کے مفادات کا ہمیشہ تحفظ کیا ہے لیکن نواز شریف حکومت شاید مزید آف شور کمپنیاں کھولنے کے لیے منافع بخش ادارے ایک ہاتھ سے بیچ کر دوسرے ہاتھ سے خرید کر رہی ہیں۔
بلاول بھٹو زرداری نے پورٹ قاسم کے ڈاک مزدوروں کو پارٹی کی مکمل حمایت کی یقین دہانی کراتے ہوئے کہا کہ پیپلزپارٹی ان کی جدوجہد میں انہیں تنہا نہیں چھوڑے گی اور ہر موجود فورم پر ان کے مسائل پر آواز اٹھائے گی۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں