لاڑکانہ: پیپلزپارٹی کے چیئرمین بلاول بھٹو زرداری نے کہا ہے کہ حکمرانوں کو ملک کی نہیں بلکہ پاناما کی فکر ہے، نوازشریف اپنے آپ کو بچانے کے لیے خطرناک کھیل کھیل رہے ہیں جس سے وفاق کمزور ہورہا ہے، نوازشریف عوام کو بے وقوف نہیں بنا سکتے۔
پیپلزپارٹی کے بانی ذوالفقار علی بھٹو کی برسی کی تقریب سے خطاب کرتے ہوئے بلاول بھٹو نے کہا کہ بھٹو کسی شخصیت نہیں بلکہ نظریے کا نام ہے، چالیس سال پہلے ایک آمر نے بھٹو کا باب مٹانے کی کوشش کی مگر بھٹو عوام میں آج تک زندہ ہے۔
انہوں نے کہا کہ ذوالفقار علی بھٹو کی پھانسی عوام، خواتین، نوجوانوں اور غریبوں کا باب ختم کرنے کے لیے دی گئی مگر آمر کو ناکامی ہے کیونکہ بھٹو کا نام آج تک زندہ ہے، آمرانہ پالیسی کے باعث ملک کو آگ میں جھونک دیا گیا جس کا خمیازہ آج تک بھگت رہے ہیں۔
بلاول بھٹو نے کہا کہ میاں صاحب عوامی حمایت سے نہیں بلکہ دھونس دھمکی سے حکومت میں آئے، نیشنل ایکشن پلان پر عملدرآمد ہوتا تو آج آرمی کورٹ کی ضرورت نہیں پڑتی، جوڈیشل ریفارمز سمیت کسی شعبے میں اصلاحات نہیں لائی گئی اور یہ حکومتی ناکامی کا سب سے بڑی ناکامی ہے۔
چیئرمین پیپلزپارٹی نے کہا کہ میاں صاحب وفاق کو کمزور کرنے کا خطرناک کھیل کھیل رہے ہیں مگر پی پی وفاق کی حفاظت ہرصورت پر کرے گی، نوجوانوں کی مدد سے آئندہ حکومت بنائیں گے اور کرپشن کرنے والوں کو منطقی انجام تک پہنچائیں گے۔
مسلم لیگ ن پر تنقید کرتے ہوئے بلاول نے کہا کہ ملک میں دودھ اور شہد کی نہریں بہنے کا دعویٰ کیا جاتا ہے مگر یہ کہاں بہہ رہی ہیں کسی کو نظر نہیں آتی، ملکی ترقی صرف اشتہارات کی حد تک محدود ہے، وفاق کو استعمال کرتے ہوئے چھوٹے صوبوں کا حق مار کر مخصوص علاقوں کو گیس فراہم کی جارہی ہے۔
بلاول بھٹو نے نوجوانوں سے اپیل کی کہ وہ آگے آئیں اور سیاست کو کاروبار، منافع کے لیے استعمال کرنے والوں کا تختہ پلٹ دیں تاکہ ہمارے نوجوان اپنی صلاحیتوں کا لوہا منوا سکیں۔
