کراچی: پاکستان پیپلز پارٹی کے چیئرمین بلاول بھٹو زرداری نے کہا ہے کہ گھوٹکی الیکشن مخالفین کے لیے واضح پیغام ہے، چیئرمین سینیٹ حاصل بزنجو ہوں گے۔
تفصیلات کے مطابق پی پی چیئرمین آج بلاول ہاؤس کراچی میں نیوز کانفرنس کر رہے تھے، انھوں نے کہا کہ حکومت کا ایک ووٹ کم اور اپوزیشن کا ایک ووٹ بڑھ گیا، فضل الرحمان اور ن لیگ کی حمایت کا شکریہ ادا کرتا ہوں، گھوٹکی الیکشن مخالف سیاست دانوں کے لیے واضح پیغام ہے۔
بلاول بھٹو کا کہنا تھا کہ صاف نظر آ رہا ہے چیئرمین سینیٹ حاصل بزنجو صاحب ہی ہوں گے، حکومتی ارکان سینیٹرز سے خفیہ رابطے کر کے پیسا آفر کر رہے ہیں، میں اپوزیشن سینیٹرز سے کہتا ہوں حکومت سے پیسے لے لو مگر ووٹ ہمیں دو۔
پی پی چیئرمین نے کہا کہ ہم ایک روپیا خرچ نہیں کریں گے اور ان کا پیسا ضایع ہونے والا ہے، حکومت کے کچھ لوگ ہم سے رابطے میں ہیں اور ہمیں ووٹ دیں گے۔
یہ بھی پڑھیں: گھوٹکی الیکشن میں مخالف امیدوار کی حمایت، پی پی کے ایم پی اے سے استعفیٰ لینے کا فیصلہ
انھوں نے مزید کہا کہ سینیٹ تمام صوبوں کا ایک فورم ہے جہاں ہمیں برابری کا اختیار نہیں دیا جاتا، حکومتی سازشیں ناکام ہوں گی، اپوزیشن کا متفقہ امیدوار جیت جائے گا۔
بلاول بھٹو نے یوم سیاہ منانے کا اعلان کرتے ہوئے کہا کہ کل 25 جولائی کو ہم یوم سیاہ منا رہے ہیں، پی پی کارکنان کراچی پہنچیں، اگر آپ بلوچستان، کوئٹہ، یا پنجاب میں کہیں ہیں تو لاہور پہنچیں۔ کارکنان اگر کے پی میں ہیں تو پشاور پہنچیں، کیوں کہ ملک بھر میں مشترکہ احتجاج ہوگا۔
تازہ ترین خبریں پڑھیں: سینیٹ چیئرمین کے خلاف تحریک عدم اعتماد، حکومت اور اپوزیشن میں بیک ڈور رابطے
پی پی چیئرمین کا کہنا تھا کہ حکومت کو امریکا سمیت دیگر ممالک سے بڑھ چڑھ کر وعدے نہیں کرنے چاہئیں، حکومت کے پاس لانگ ٹرم وژن نہیں، پاکستان اور افغانستان کے بہت سے مسائل ہیں، حکومت ایسے وعدے نہ کرے جس پر عمل نہیں ہو سکتا۔
انھوں نے کہا کہ نواز شریف ہو یا کوئی دہشت گرد انسانی حقوق سب کو ملنے چاہئیں، حکومت سے مطالبہ ہے انسانی حقوق فراہم کرو، این آر او کی باتیں عمران خان کی حکومت بچانے کی کوششیں ہیں، جمہوری طریقے اپنائیں تو پیپلز پارٹی سپورٹ کرے گی، معاشی حقوق پر حملے کریں گے تو پیپلز پارٹی آپ کے سامنے کھڑی ہوگی۔
