The news is by your side.

Advertisement

آج ملک اورجمہوریت کیلئے بہت بڑا دن ہے، بلاول بھٹو زرداری

کراچی : پیپلز پارٹی کے چئیرمین بلاول بھٹو نے کہا ہے کہ آج پاکستان اورجمہوریت کیلئےبہت بڑا دن ہے، سپریم کورٹ کا فیصلہ سب کو ماننا ہوگا، حکومت اپنی مدت پورے کرے، وزیراعظم کیلئے پیپلزپارٹی اپنا امیدوار سامنے لائےگی۔

ان خیالات کا اظہار انہوں نے کراچی میں پریس کانفرنس سے خطاب کرتے ہوئے کیا، بلاول بھٹو نے کہا کہ پیپلزپارٹی نے ہمیشہ پارلیمنٹ، جمہوریت اور اداروں کی حمایت کی ہے، سپریم کورٹ کے فیصلےکاخیرمقدم کرتےہیں، یہ فیصلہ ملک سے کرپشن ختم کرنے میں اہم ثابت ہوگا۔

انہوں نے کہا کہ آج پاکستان اور جمہوریت کیلئے بہت بڑا دن ہے، پیپلزپارٹی ہرایک کےاحتساب کا مطالبہ کرتی ہے، سپریم کورٹ کا فیصلہ ملک کے فائدے میں جائےگا، شہید بینظیر نے کہا تھا کہ ایک دن نوازشریف کو میرے خلاف سازشوں پر رونا پڑے گا، بی بی نے یہ بھی کہا تھا کہ ایک دن نوازشریف غمزدہ ہونگے اور مجھے یاد کرینگے۔

بلاول بھٹو نے کہا کہ ہم چاہتے ہیں کہ حکومت اپنی مدت پورے کرے، تمام جماعتوں پر لازم ہے کہ وہ سپریم کورٹ کے فیصلے پرعمل کریں، اس موقع پر انہوں نے اعلان کیا کہ وزیراعظم کیلئے پیپلزپارٹی اپنا امیدوار بھی نامزد کرے گی، آئندہ الیکشن کیلئے ہم اپنا منصوبہ بنا چکےہیں، میں ملک بھر میں جلسے کروں گا۔

چیئرمین پیپلزپارٹی بلاول بھٹو کا کہنا تھا کہ پیپلزپارٹی نے پاناما ایشو کو اٹھایا اور اپنی حکمت عملی کے مطابق چلے، ہم نوازشریف سے رابطہ نہیں کریں گے، نوازشریف اپنی اور ہم اپنی سیاست کریں گے، میں نے کس حلقے سے الیکشن لڑنا ہے اس کا فیصلہ پارٹی کرے گی۔

ان کا کہنا تھا کہ ملک میں قانون کی حکمرانی ہونی چاہئیے، پیپلزپارٹی چاہتی ہےاسمبلیاں اپنی آئینی مدت پوری کریں، نوازشریف کے خلاف متعدد کیسز ابھی بھی التواء کا شکار ہیں، پاناما میں ہمارا نام آتا تو ایک دن میں فارغ ہوجاتے۔

انہوں نے کہا کہ میں نے آج کوئی مٹھائی نہیں کھائی، سپریم کورٹ کا فیصلہ عدالتی مارشل لا ہرگز نہیں ہے، میرے خلاف بھی کیسز ہیں تو تحقیقات کیلئے تیار ہوں۔

Print Friendly, PDF & Email

Comments

comments

یہ بھی پڑھیں