وزیر خارجہ بلاول بھٹو نے کہا ہے سیاسی استحکام آئے بغیر ترقی ممکن نہیں لیکن عمران خان کی وجہ سے ملک میں سیاسی استحکام نہیں آ رہا ہے۔
اے آر وائی نیوز کے مطابق وزیر خارجہ بلاول بھٹو زرداری نے واشنگٹن کے پاکستانی سفارتخانے میں پریس کانفرنس کرتے ہوئے کہا کہ سیاسی استحکام آئے بغیر ترقی ممکن نہیں لیکن عمران خان کی وجہ سے ملک میں سیاسی استحکام نہیں آ رہا ہے۔ ہم جھوٹ کی سیاست کا مقابلہ سچ کی سیاست سے کر رہے ہیں۔
وزیر خارجہ نے کہا کہ پاکستان میں انتخابات اپنے وقت پر ہوں گے اور کوئی بھی سیاسی جماعت یا ادارہ عمران خان کی بلیک میلنگ میں نہیں آئے گا۔
ان کا کہنا تھا کہ خیبرپختونخوا میں دہشت گردی عمران خان کی پالیسیوں کی وجہ سے پھیلی۔ اگر پی ٹی آئی نے وہاں توجہ دی ہوتی تو آج یہ حالات نہ ہوتے۔
بلاول بھٹو نے مزید کہا کہ پاکستان موسمیاتی تبدیلیوں سے بہت متاثرہوا ہے۔ ملک میں رواں سال ریکارڈ بارشیں سیلاب کا باعث بنیں اور تباہ کن سیلاب سے بہت بڑے پیمانے پر تباہی پھیلی. سیلاب سے ملک کو 30 ارب ڈالرز کا نقصان پہنچا ہے۔
