لاہور : چیئرمین پیپلزپارٹی بلاول بھٹو کا کہنا ہے کہ لیول پلینگ فیلڈ کا مطالبہ مسلم لیگ نواز سے ہے، اعتراض کسی اور سے ہوتا تو اس کا نام لیتا۔
تفصیلات کے مطابق چیئرمین پیپلزپارٹی بلاول بھٹو نے میڈیا سے گفتگو کرتے ہوئے کہا کہ سی ای سی نے لیول پلینگ فیلڈ پر اعتراضات پر زرداری صاحب کوٹاسک دیاہے، والدصاحب کو اتنا اسپیس دیں کہ ہمارے اعتراضات کو دور کیا جائے، جہاں تک لیول پلینگ فیلڈکی بات ہے وہ سب کو نظر آرہا ہے، لیول پلینگ فیلڈ کا مطالبہ مسلم لیگ نواز سے ہے۔
نواز شریف کی واپسی پر بلاول بھٹو کا کہنا تھا کہ پیپلزپارٹی کا بہت پرانا مطالبہ ہے کہ میاں صاحب واپس آئے، میاں صاحب نے واپسی کی تاریخ کااعلان کیا ہے پیپلزپارٹی ویلکم کرے گی ، جہاں تک کیسز کا سوال ہے ہم بھی سامنا کرنےکوتیارہیں، امیدہےمیاں صاحب بھی کیسزکاسامنا کریں گے۔
انتخابات کے حوالے سے چیئرمین پی پی نے کہا کہ الیکشن کی تاریخ کےاعلان کا اختیار الیکشن کمیشن کےسوا کسی کے پاس نہیں۔
ان کا فنڈز سے متعلق کہنا تھا کہ جو ترقیاتی اسکیمیں منظورہوئی تھیں انہیں چلنا چاہئے، ترقیاتی اسکیم کے فنڈز کو روکنا درست نہیں ہے، ایسانہیں ہوسکتا، سندھ میں اسکیم کو اجازت نہیں دوسرے صوبے میں اجازت ہے، لیول پلینگ فیلڈ ڈیولپمنٹ فنڈز کے حوالے سے ایک جیسا ہونا چاہئے۔
بلاول نے کہا کہ میڈیا پر جوکردارکشی مہم چل رہی ہےاس پردھیان نہ دیں، پیپلزپارٹی میں ہردن کوئی نہ کوئی شامل ہورہاہے، کوئی بندہ جو بلوچستان سے شامل ہوا پھر نکل گیا تو ہم نے ریکوئسٹ نہیں کی تھی۔
بڑھتی مہنگائی سے متعلق سوال پر پی پی چیئرمین کا کہنا تھا کہ مہنگائی پاکستانی عوام کا سب سے بڑا ایشو ہے، عوام کو دلچسپی نہیں کون کیا کر رہا ہے، قیدی نمبر فلاں فلاں کا کیا ڈرامہ کر رہا ہے، عوام کا مسئلہ ہے بچوں کی فیس اور دوائیاں کیسے پوری ہوں گی ، اس مہنگائی میں عوام کو ایک امید، روڈ میپ کی ضرورت ہے۔
انھوں نے مزید کہا کہ عوام کو اتنا حق ہونا چاہئے، مشکل گھڑی میں اپنے نمائندے منتخب کریں اور نمائندوں کی اولین ترجیح ہونی چاہئےکہ مہنگائی میں عام آدمی کوکیسے ریلیف دیں ۔
پیپلز پارٹی کے دور حکومت کا ذکر کرتے ہوئے بلاول بھٹو کا کہنا تھا کہ جب ہماری حکومت تھی تودنیامیں معاشی بحران تھا، پاکستان میں تاریخی مہنگائی تھی ، چینی، چاول اور گندم بھی باہر سے منگوانا پڑتی تھی، جب پیپلزپارٹی نے دیکھا مہنگائی ہے تو بی آئی ایس پی دیا ، ہم نے اپنے دور میں تنخواہ،پنشنز میں اضافہ کیا۔
سپریم کورٹ میں سپریم کورٹ پریکٹس اینڈپروسیجرایکٹ کیس سے متعلق چیئرمین پی پی نے کہا کہ یہ کیس پارلیمان کی بالادستی کے حوالےسے ہے اور بہت اہمیت رکھتا ہے ، بینچ بنانے کے اختیار کے معاملے پر اس کیس کے نتیجے میں فیصلہ سامنے آئے گا ، بینچ بنانےکااختیاراب تک چیف جسٹس کا صوابدید ہے ، جب اس کیس کافیصلہ آئے گا تو پھر مزید صورتحال کلیئر ہوگی۔
