The news is by your side.

Advertisement

گالم گلوچ کی سیاست ملک کے مستقبل کے لیے خطرہ ہے: بلاول بھٹو

اسلام آباد: پاکستان پیپلز پارٹی کے چیئرمین بلاول بھٹو کا کہنا ہے کہ پاکستان بچانے اور شہید بی بی کا وعدہ نبھانے نکلا ہوں، گالم گلوچ کی سیاست ملک کے مستقبل کے لیے خطرہ ہے۔

تفصیلات کے مطابق پاکستان پیپلز پارٹی کے چیئرمین بلاول بھٹو نے پریس کانفرنس کرتے ہوئے کہا کہ پیپلز پارٹی کی انتخابی مہم کا آغاز کراچی سے کیا۔ سندھ، پنجاب اور خیبر پختونخواہ میں جلسے کیے، لوگوں سے ملاقات کی۔ دہشت گردی کی وجہ سے بعض جگہوں پر جلسے منسوخ بھی کیے۔

ان کا کہنا تھا کہ مسائل اور چیلنجز کو اجاگر کر رہے ہیں، پیپلز پارٹی اپنا منشور پیش کر رہی ہے۔ لوگ خوش ہیں اور پیپلز پارٹی سے جذبے کا اظہار کر رہے ہیں۔ عوام کی جانب سے پیپلز پارٹی کے منشور کو اہمیت دی جارہی ہے۔

بلاول نے کہا کہ انتخابی مہم کے دوران میری توجہ پارٹی منشور اور عوامی مسائل پر رہی۔ ملک میں خارجہ پالیسی، انتہا پسندی اور دہشت گردی کے مسائل ہیں۔ ملک کے اہم ایشوز کو حل کرنے کی کوشش کریں گے۔ ’شہید بی بی کے خواب کی تعبیر کے لیے اور پاکستان کو بچانے کے لیے نکلا ہوں‘۔

انہوں نے کہا کہ شہباز شریف کی گالم گلوچ بریگیڈ کی سیاست کا ملک متحمل نہیں ہو سکتا۔ مخالفین پر تنقید سیاست کا ایک حصہ ہے لیکن گالم گلوچ کے ذریعے کوئی اپنا مقصد حاصل نہیں کر سکتا۔

پیپلز پارٹی کے چیئرمین کا کہنا تھا کہ ہم نے ہمیشہ کٹھ پتلی اتحادوں کا سامنا کیا۔ گرینڈ الائنس میں شامل کتنے لوگ وزیر اعلیٰ رہ چکے ہیں۔ یقین ہے ہم کٹھ پتلی الائنس والوں کو شکست دیں گے۔

انہوں نے کہا کہ پنجاب میں پیپلز پارٹی پہلے سے زیادہ سیٹیں حاصل کرے گی۔ میثاق جمہوریت کا نواز شریف، شہباز شریف کے ساتھ تجربہ اچھا نہیں رہا۔


خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

Comments

comments

یہ بھی پڑھیں