کراچی : پاکستان پیپلزپارٹی کے چیئرمین بلاول بھٹو زرداری نے آخری پیغمبر حضرت محمد ﷺ کے یومِ ولادت با سعادت کے موقع پر عالم اسلام کے تمام مسلمانوں کو مبارکباد دیتے ہوئے اسوہ حسنہ کو تمام عالم کے لیے نمونہ عمل قرار دیا۔
پاکستان پیپلزپارٹی کے چیئرمین بلاول بھٹو زرداری نے کہا کہ محسن انسانیت حضرت محمد مصطفیٰ ﷺ کے یوم ولادت پر ہمیں اس عزم کا اعادہ کرنا چاہیے کہ ہم تمام انسانیت اور کائنات کی مزید بہتری کے لیے ان کی دانشمندی، برداشت، پیار، امن اور انسانی مساوات کی تعلیمات کی مکمل سچائی سے پیروی کریں گے۔
انہوں نے کہا کہ محسن انسانیت حضرت محمد مصطفیٰ ﷺ تمام انسانیت کے لیے تعلیمات، روایات اور اصولوں کا خزانہ چھوڑ گئے ہیں، جس کی پیروی کرنے سے زندگی بہتر بنائی جا سکتی ہے۔
بلاول بھٹو زرداری نے کہا کہ اس پر مسرت موقع پر میں تمام مسلمانوں کو مبارکباد دیتا ہوں،اللہ تعالیٰ سے دعاگو ہوں کہ ہمیں حضرت محمد مصطفیٰ ﷺ کی تعلیمات پر چلنے کے لیے اپنی رہبری اور حکمت کی نعمت سے نوازے اور ہمارے روح کومحسن انسانیت حضرت محمد مصطفیٰ ﷺ کی پورے کائنات کو روشن کرنے والی روشنی سے دوبارہ منور کردے۔
واضح رہے کل پورے عالم اسلام میں اللہ کے آخری نبی کا یوم ولادت با سعادت منایا جا رہا ہے جس میں خصوصی محافل زکر منعقد کی جاتی ہیں، اور عاشقان رسول بارگاہے رسالت میں نعتیہ کلام اور درود سلام سے فضاء معطر رکھتے ہیں۔
