کراچی: چیئرمین پیپلز پارٹی بلاول بھٹو زرداری نے کہا ہے کہ پانی کی قلت دور کرنے کے لیے اگر سمندر کا پانی بھی میٹھا کرنا پڑا تو کریں گے، یہ میرا وعدہ ہے۔
ان خیالات کا اظہار انھوں نے چاکیواڑہ میں کارکنوں سے خطاب کرتے ہوئے کیا، بلاول بھٹو زرداری نے کہا کہ ہمارا وعدہ بی بی کا وعدہ ہے، ہم نے پاکستان بچانا ہے۔
بلاول بھٹو زرداری کے قافلے نے لیاری میں علاقہ مکینوں کی طرف سے پانی کی قلت پر شدید احتجاج کا سامنا کرنے کے بعد چاکیواڑہ کا رُخ کیا، چاکیواڑہ میں خطاب کے دوران بلاول نے کہا کہ ہم جیت گئے تو پانی کی قلت دور کریں گے۔
انھوں نے اپنے خطاب میں ”لے کے رہے گا ہر انسان : روٹی کپڑا اور مکان“ کا نعرہ لگاتے ہوئے کہا مسائل حل کرنے کے لیے مجھے آپ کا ساتھ چاہیے، آپ میرے ساتھ ہوں تو کوئی ہمارا راستہ نہیں روک سکتا۔
چیل چوک
بلاول بھٹو زرداری کا قافلہ چیل چوک پہنچے پر انھوں نے ریلی کے شرکا سے خطاب کرتے ہوئے کہا کہ ہم سمندر کا پانی میٹھا کر کے لیاری کےعوام کو دیں گے۔
لیاری میں بلاول بھٹو کے قافلے پر پتھراؤ، مظاہرین نے پیپلز پارٹی کا جھنڈا جلا دیا
چیل چوک پہنچنے پر بھی علاقہ مکینوں نے پیپلز پارٹی کے قافلے کے خلاف احتجاج کیا، مظاہرین نے لیاری کو پانی دو پانی دو کے نعرے لگائے، ریلی میں شامل جیالوں نے بلاول بھٹو زرداری کے حق میں جوابی نعرے لگائے۔
بلاول بھٹو نے خطاب میں کہا کہ ہم نے پاکستان کو بچانا ہے اور لوگوں کو روزگار دینا ہے، اقتدار میں آکر روزگار کے لیے بلا سود قرضے دیں گے۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
