اسلام آباد: بلاول بھٹو زرداری نے حفیظ شیخ کی وزیر خزانہ کے عہدے سے برطرفی کو پاکستان ڈیموکریٹک موومنٹ کی فتح قرار دے دیا۔
تفصیلات کے مطابق پی پی چیئرمین بلاول بھٹو نے ایک ٹوئٹ میں کہا ہے کہ حفیظ شیخ کی وزیر خزانہ کے عہدے سے برطرفی پی ڈی ایم کی فتح ہے۔
انھوں نے لکھا ’پی ٹی آئی ایم ایف‘ وزیر کو سینیٹ کے عہدے کے لیے منتخب ہونے کی ضرورت تھی، لیکن سینیٹ میں شکست نے وزیر کے عہدے پر رہنا ان کے لیے نا ممکن بنا دیا تھا۔
انھوں نے کہا اب حکومت نے تسلیم کر لیا ہے کہ اس کی ناکام پالیسیوں سے مہنگائی آسمان پر پہنچ گئی ہے۔ بلاول نے یہ بھی کہا کہ پارلیمانی حزب اختلاف نے خود کو حکومت کے مقابلے میں انتہائی مؤثر ثابت کر دیا ہے۔
وزیرخزانہ حفیظ شیخ کو کیوں ہٹایا گیا؟ وجہ سامنے آگئی
واضح رہے کہ آج حفیظ شیخ کو وزیر خزانہ کے عہدے سے ہٹا دیا گیا ہے جب کہ حماد اظہر نئے وزیر خزانہ ہوں گے۔
Sacking Finance minister is victory of PDM. PTIMF minister needed to be elected to continue in post & senate defeat made that impossible. Now government admits inflation is skyrocketing because of its failed policies. Parliamentary opposition proven most effective vs this regime.
— BilawalBhuttoZardari (@BBhuttoZardari) March 29, 2021
سینیٹر شبلی فراز نے بتایا کہ حفیظ شیخ کو مہنگائی کی وجہ سے وزارت خزانہ کے عہدے سے ہٹایا گیا، مہنگائی کی وجہ سے وزیر اعظم عمران خان مطمئن نہیں تھے اور پریشان تھے، حماد اظہر وزیر اعظم عمران خان کے وژن کو آگے لے کر چلیں گے۔
انھوں نے کہا کہ وزیر اعظم نے نئی ٹیم لانے کا فیصلہ کیا ہے، فنانس کی نئی ٹیم تشکیل دی گئی ہے، ملکی حقائق کو مد نظر رکھ کر فیصلے کیے جاتے ہیں، کل تک چیزیں فائنل ہو جائیں گی۔
ذرائع کا کہنا ہے کہ شبلی فراز کو وزارت پٹرولیم کا قلم دان دیے جانے کا امکان ہے، جب کہ اطلاعات اور نشریات کی وزارت کو 2 حصوں میں تقسیم کرنے پر مشاورت ہو رہی ہے، امکان ہے کہ دونوں کے الگ الگ وزیر مملکت لائے جائیں، فواد چوہدری کو بھی اضافی ذمہ داری دیے جانے کا امکان ہے۔
