اسلام آباد : مائیکروسافٹ کےبانی بِل گیٹس نے انسداد کورونا اور عوام کے تحفظ کیلئے این سی اوسی کی تعریف کرتے ہوئے اسمارٹ اور مائیکرواسمارٹ لاک ڈاؤن اسٹریٹجی میں خصوصی دلچسپی لی۔
تفصیلات کے مطابق مائیکروسافٹ کےبانی بِل گیٹس نے نیشنل کمانڈ اینڈ آپریشن سینٹر (این سی او سی) کا دورہ کیا، جہاں انھوں نے چیئرمین این سی اوسی اسدعمر اور معاون خصوصی ڈاکٹر فیصل سلطان سے ملاقات کی۔
بل گیٹس نے وفد کے ہمراہ این سی اوسی کے اجلاس میں شرکت کی اور این سی اوسی کے کردار ،طریقہ کار اور کامیابیوں کو سراہا۔
بل گیٹس نے انسداد کورونا اور عوام کے تحفظ کیلئے این سی اوسی کی تعریف کرتے ہوئے اسمارٹ اورمائیکرواسمارٹ لاک ڈاؤن اسٹریٹجی میں خصوصی دلچسپی لی۔
بل گیٹس نے این سی اوسی میں کوروناویکسینیشن مہم پر اپنا نقطہ نظر پیش کیا ، جس پر اسد عمر نے بل گیٹس کی جانب سے پاکستان کو کورونا سے نمٹنے کیلئے تعاون پر شکریہ ادا کرتے ہوئے کہا ہمیں کوروناسے نمٹنے میں کامیابی عوام کے تعاون سے ملی۔
اس سے قبل وزیراعظم عمران خان سے مائیکروسافٹ کےبانی بِل گیٹس کی ملاقات ہوئی تھی ، ملاقات میں پولیو کے خاتمے اور دیگر اہم موضوعات پر بات چیت کی گئی۔
وزیراعظم نے پولیو کے خاتمے کیلئے کے تعاون پر بل گیٹس سے اظہار تشکر کرتے ہوئے کورونا سے نمٹنے کیلئے حکومت پاکستان کے اقدامات سےبھی آگاہ کیا۔
