اسلام آباد: وزیر خارجہ بلاول بھٹو نے الزام عائد کیا ہے کہ عمران خان کی وجہ سے مذاکرات میں رکاوٹ پیدا ہوئی۔
تفصیلات کے مطابق پارلیمنٹ ہاؤس میں میڈیا سے گفتگو کرتے ہوئے بلاول بھٹو نے کہا کہ نو مئی سے قبل پیپلزپارٹی مذاکرات کی سب سے بڑی حامی تھی، مذاکرات جاری تھے لیکن عمران کےرویئے کی وجہ سےخرابی ہوئی، اب ہمارے پاس بحیثیت سیاسی جماعت کوئی آپشن نہیں کہ بات چیت کریں۔
وزیر خارجہ نے دعویٰ کیا کہ ہمارے اور پی ٹی آئی وفود نے انتخابات کی تاریخ پرمذاکرات کرلئےتھے، عمران خان کی وجہ سے مذاکرات میں رکاوٹ پیدا ہوئی اور نومئی کے بعد انہوں نے تمام ریڈ لائنز کراس کر دی ہیں، ہم کچھ نہیں کرسکتے۔
بلاول بھٹو کا کہنا تھا کہ ذاتی حیثیت میں کسی جماعت پر پابندی کی مخالفت کرتا ہوں،لیکن کسی بھی سیاسی جماعت کو سوچنا ہوگا کہ اگرکوئی سیاسی جماعت دہشت گرد تنظیم بنناچاہ رہی ہوتو کیاکیاجائے؟ میں سمجھتا ہوں کہ پی ٹی آئی کے اندر یہ صلاحیت ہے کہ وہ سیاسی جماعت بنے۔
میڈیا سے گفتگو میں چیئرمین پیپلزپارٹی وزیرخارجہ بلاول بھٹو نے واضح کیا کہ میڈیا میں ملٹری کورٹس کے حوالے سےغلط فہمی ہے، حکومت آئینی ترمیم سے کوئی نئی ملٹری کورٹس قائم نہیں کررہی، آفیشل سیکریٹ ایکٹ اور آرمی ایکٹ پہلےسے موجود ہے، جس قانون کی خلاف ورزی ہوئی اسی قانون کےمطابق کارروائی ہوگی۔
بلاول بھٹو نے ایران پاکستان تعلقات سے متعلق کہا کہ ایک سال میں جن ممالک سےتعلقات بہترہوئے ان میں ایران بھی شامل ہے، دونوں ممالک نے سیکیورٹی مسائل کے مشترکہ حل پرزور دیا، ایران پاکستان کے درمیان بارڈرمارکیٹ اوربجلی ترسیل کاافتتاح ہوا جو کہ خوش آئند ہے۔
وزیرخارجہ کا کہنا تھا کہ بھارت سے دو طرفہ تعلقات بحالی پانچ اگست اقدام کی واپسی کےبعدممکن ہے، بھارت سے بات کرنی ہےتو چند معاملات پر فیصلہ کرنا ہو گا،بھارت یکطرفہ طورپربین الاقوامی قوانین کی خلاف ورزی کررہا ہے،ہمارے جو بھی اندرونی معاملات ہوں ہم کشمیر پر متفق ہیں۔
