کراچی : پاکستان ویمنز کرکٹ ٹیم کی کپتان بسمعہ معروف نے کہا ہے کہ میرے پسندیدہ کھلاڑی بھارت کے ویرات کوہلی ہیں وہ نوجوان کرکٹرز کے لیے رول ماڈل ہیں۔
یہ بات انہوں نے کراچی میں ویڈیو کانفرنس سے خطاب کرتے ہوئے کہی، کپتان بسمعہ معروف نے کہا کہ پاکستان اور بھارت کے مقابلے کا سبھی کو انتظار رہتا ہے اور دونوں ٹیموں کے درمیان پوائنٹس کو یکساں طور پر تقسیم کا فیصلہ مایوس کن ہے۔
انہوں نے کہا کہ بھارت کیخلاف ہمارا مقابلہ ہمیشہ اچھا رہا ہے، بغیر میچز کھیلے بھارت کو پوائنٹس ملے ہیں مقابلے کے بعد اگر پوائنٹس مس کرتے تو مایوس نہیں ہوتے، پاکستان کرکٹ بورڈ کی لیگل ٹیم اس معاملہ کو دیکھ رہی ہے۔
ایک سوال کے جواب میں کپتان ویمنز ٹیم کا کہنا تھا کہ ثنا میر کی پاکستان کیلئے خدمات قابل تحسین ہیں، ثنا میر کو خراج تحسین پیش کرتے ہوئے فیئر ویل دینا چاہیئے، اگر میں انٹرنینشل پلینگ الیون بناؤں تو ثنامیر اس ٹیم کی کپتان ہوں گی اور بھارت کی میتھالی راج اور ہرمن پریت کور کو بھی ٹیم میں شامل کروں گی۔
انہوں نے کہا کہ آسٹریلیا سے ایلس پیری، میگ لیننگ اور ایلسا ہیلی بھی ٹیم کا حصہ ہوں گی اپنے پسندیدہ کرکٹرز سے متعلق ان کا کہنا تھا کہ میرے پسندیدہ کھلاڑی بھارت کے ویرات کوہلی ہیں، ویرات کوہلی نوجوان کرکٹرز کے رول ماڈل ہیں۔
بسمعہ معروف نے کہا کہ کورونا لاک ڈاؤن میں رہتے ہوئے ہمیں ذہنی طور پر مضبوط ہونا پڑے گا، مردوں کے برعکس ہمیں گھر میں رہ کر والدہ کا ہاتھ بٹانا پڑتا ہے۔
انہوں نے کہا کہ بھارتی ویمنز کرکٹ کا گراس روٹ پاکستان سے زیادہ مضبوط ہے پاکستان میں اس پر کام دیر سے شروع کیا گیا، ویمنز کرکٹرز کو موقع دیا جائے تو وہ بھی اسٹارز بن سکتی ہیں۔
