مونٹانا : امریکہ کے ایک جنگل میں خوفناک کالا ریچھ سائیکل سوار کے پیچھے لگ گیا، ویڈیو دیکھنے والے خوف اور حیرت کے عالم میں دم بخود رہ گئے۔
آپ نے اکثر فلموں میں ریچھ کو حملہ کرتے ہوئے دیکھا ہوگا کہ اس کا حملہ کرنے کا طریقہ اتنا خوفناک ہوتا ہے کہ وہ اپنے شکار کو سب سے پہلے گردن سے دبوچ کر اسے بے بس کردیتا ہے۔
جنگل میں خونخوار درندوں کی اس طرح کی وارداتیں روزانہ کا معمول ہوتی ہیں۔ اسی لیے شکار کرنے والے لوگ مکمل احتیاطی تدابیر کو اختیار کرتے ہوئے جنگل میں اپنی نقل و حمل جاری رکھتے ہیں۔
اسی طرح کی ایک خطرناک ویڈیو مونٹانا کے جنگلات کی ہے جسے مونٹانا نائف کمپنی نے فیس بک پر شیئر کیا جسے دیکھ صارفین نے کمنٹس میں خوف اور حیرت کا اظہار کرتے ہوئے اپنے خیالات کا اظہار کیا۔
اس ویڈیو میں دیکھا جاسکتا ہے کہ ایک پہاڑی سے صحت مند کالا ریچھ دوڑتا ہوا آرہا ہے، کیمرہ مین نے جیسے ہی کیمرے کا رخ پہاڑی کے نیچے کی جانب کیا تو اسے ایک سائیکل سوار نظر آیا۔
اس کے بعد کا منظر اور بھی خطرناک تھا وہ ریچھ اسی سائیکل سوار کا تعاقب کرتے ہوئے پہاڑی کے درمیان مختصر سے راستے سے ہوتا ہوا اس کے قریب پہنچنے ہی والا تھا کہ تیز رفتار سائیکل سوار اس کی پہنچ سے دور ہوگیا۔
مونٹانا نائف کمپنی نے اس ویڈیو کے عنوان میں لکھا کہ یہ ویڈیو آپ کو یہ یقین دہانی کرانے کیلئے پوسٹ کی گئی ہے جس کا مقصد آپ کو محتاط کرنا ہے کہ مونٹانا ڈزنی لینڈ ایریا نہیں ہے، یہاں کالے اور خطرناک ریچھ اور دیگر خوفناک جانور موجود ہیں۔
