The news is by your side.

بچہ کالا کیوں‌ ہے؟ شوہر نے بیوی کو قتل کر دیا

اڈیشا: بھارت میں ایک شخص نے اپنی بیوی کو اس بات پر قتل کر دیا کہ ان کا بچہ کالا کیوں ہے؟

بھارتی میڈیا کے مطابق ریاست اڈیشا (سابقہ اڑیسہ) میں ایک شخص مانک گھوش نے اپنی بیوی کو جان سے مار دیا، وہ اپنی بیوی کو بچہ کالا ہونے پر پیٹتا رہتا تھا۔

پولیس نے ہفتے کو مانک گھوش کے خلاف اس کے سسر کی مدعیت میں قتل کا مقدمہ درج کر کے اسے گرفتار کر لیا ہے۔

قتل کے واقعے کا انکشاف اس وقت ہوا جب مقتول کی ڈھائی سالہ بیٹی نے اپنے نانا کو اشاروں میں ماں کا گلا دبانے کے بارے میں بتایا، جس پر نانا تپن منڈل نے بچے کے ہمراہ عمرکوٹ تھانے میں شکایت درج کرائی۔

چوں کہ ملزم اور اس کی بیوی آندھرا پردیش کے کاکیناڈا علاقے میں رہتے تھے جہاں یہ واقعہ پیش آیا، اس لیے پولیس نے آندھرا پردیش پولیس کو بھی اس کی اطلاع کر دی۔

پولیس رپورٹ کے مطابق عمرکوٹ کے شہری مانک گھوش کی شادی سات سال قبل لپیکا منڈل سے ہوئی تھی، جو شادی کے بعد روزگار کے سلسلے میں آندھرا پردیش کے کاکیناڈا چلے گئے۔

جب بیٹی ماہی کی پیدائش ہوئی، تو اس کا رنگ کالا ہونے کی وجہ سے ملزم مانک بیوی لپیکا کی پٹائی کرنے لگا، جس کی وجہ سے لپیکا ماموں کے گھر چلی گئی، تاہم سسرال والوں نے اسے پھر منا لیا۔

رپورٹ کے مطابق 18 ستمبر ملزم نے بیوی پر حملہ کر کے اسے شدید زخمی کر دیا اور پھر دوستوں کی مدد سے اسے ایمبولینس کے ذریعے اسپتال پہنچایا، لیکن ڈاکٹروں نے لپیکا کو مردہ قرار دے دیا، تاہم متوفی کی گردن پر کاٹنے کے نشانات پائے جانے کی وجہ سے اسپتال کے عملے نے کاکیناڈا پولیس کو اطلاع دی، جس پر پولیس نے مقدمہ درج کر کے تفتیش شروع کر دی۔

دوسری طرف پوسٹ مارٹم کے بعد جب لپیکا کی آخری رسومات بھی ادا کی گئیں، تو اس کے والدین اس کی بیٹی کو اپنے ساتھ کاراگون لے آئے، تاہم بچی نے اپنے نانا تپن منڈل کو بتایا کہ اس کی ماں کی موت کیسے ہوئی۔

Comments

یہ بھی پڑھیں