میکسیکو سٹی : وسطی میکسیکو میں واقع آئل ریفائنری سے گزرنے والی تیل کی پائپ لائن میں آتشزدگی کے باعث 21 افراد ہلاک، 71 زخمی ہوگئے۔
غیر ملکی خبر رساں ادارے کے مطابق تیل کی پائپ لائن سے بہنے والے تیل مقامی افراد گھریلو اشیاء میں بھر رہے تھے کہ اچانک تیل میں ہولناک آگ بھڑک اٹھی جس نے دیکھتے ہی دیکھتے درجنوں افراد کو اپنی لپیٹ میں لےلیا۔
ریاست ہلڈاگو کے گورنر عمر فاید کا کہنا ہے کہ آتشزدگی کے باعث 21 افراد جھلس کر ہلاک ہوچکے ہیں جبکہ 71 زخمی ہیں۔
خبر رساں ادارے کا کہنا ہے کہ آتشزدگی کے باعث جھلسنے والے درجنوں افراد کو قریبی اسپتال کے برن وارڈ میں منتقل کیا گیا ہے، جہاں انہیں طبی امداد فراہم کی جارہی ہے۔
غیر ملکی میڈیا کا کہنا ہے کہ افسوسناک واقعہ میکسیکو کی ریاست ہلڈاگو کے علاقے تلاہوی لیلپان میں پیش آیا جس کے قریب سے ایک سرکاری آئل ریفائنری واقع ہے۔
ریاست ہلڈاگو کے گورنر عمر فاید کا کہنا ہے کہ ریسکیو ٹیمیں آتشزدگی پر قابو پانے میں مصروف ہیں، آگ لگنے کی وجوہات تاحال واضح نہیں ہوسکی ہیں۔
گورنر عمر فاید نے سماجی رابطے کی ویب سائٹ پر ایک ویڈیو ٹویٹ کی ہے جس میں آئل پائپ لائن میں بھڑکنے والے خوفناک آگ کو دکھا جاسکتا ہے.
Sobrevolando el lugar de los hechos ocurridos en Tlahuelilpan. Estamos aplicando todas las medidas necesarias para atender a la población de la zona. pic.twitter.com/ptPGOGLbF5
— Omar Fayad (@omarfayad) January 19, 2019
سرکاری آئل ریفائنری پامکس میں آتشزدگی کا یہ پہلا واقعہ نہیں ہے بلکہ ماضی میں بھی ایسے افسوس ناک واقعات رونما ہوتے ہیں۔
خبر رساں ادارے کے مطابق سنہ 2013 میں میکسیکو کے دارالحکومت میکسیکو سٹی آئل ریفائنری میں دھماکے کے دوران 37 افراد ہلاک ہوئے تھے جبکہ سنہ 2012 میں گیس فراہم کرنے والی کمپنی آتشزدگی کے نتیجے میں 26 افراد جان کی بازی ہارے تھے۔
