انقرہ: ترکی کے مغربی شہر ازمیر میں عدالت کے باہر کار بم دھماکے کے نتیجے میں 10 افراد شدید زخمی ہوگئے جبکہ ہلاکتوں کا خدشہ بھی ظاہر کیا جارہا ہے، متاثر ہونے والے افراد کو اسپتال منتقل کردیاگیا، پولیس نے جوابی کارروائی کرتے ہوئے دو مشتبہ دہشت گردوں کو ہلاک کردیا جبکہ فرار ہونے والے تیسرے حملہ آور کی تلاش جاری ہے۔
برطانوی خبررساں ادارے کے مطابق ترکی کے ساحلی شہر ازمیر میں دہشت گردوں کی جانب سے گاڑی میں بم نصب کر کے اُسےعدالت کے باہر کیا اور عوام کا رش بڑھتے ہی دھماکا کردیا گیا۔ جس کے نتیجے میں 10 افراد شدید جبکہ متعدد زخمی ہوئے۔
یہ بھی پڑھیں: ’’ ترکی: روسی سفیر دوران خطاب فائرنگ سے ہلاک ‘‘
ترک میڈیا کے مطابق دھماکے کے بعد پولیس کی بھاری نفری نے علاقے کو گھیرے میں لے کر شواہد اکھٹے کرلیے ہیں تاہم اس دوران وہاں چھپے دہشت گردوں کی جانب سے پولیس پر فائرنگ کی گئی جس کے بعد پولیس نے جوابی کارروائی کے دوران 2 مبینہ دہشت گردوں کو فائرنگ کر کے ہلاک کردیا۔ دھماکے کے نتیجے میں زخمی ہونے والے افراد کو ریسکیو اداروں کی مدد سے اسپتال منتقل کردیا گیا، اسپتال ذرائع نے ہلاکتوں کا خدشہ بھی ظاہر کیا ہے۔
حکومتی کے مقامی عہدیدار کے مطابق دھماکے کے بعد پولیس کے پہنچتے ہی گھات لگائے دہشت گردوں نے پولیس پارٹی پر حملہ کیا تاہم پولیس کی جوابی فائرنگ سے 2 دہشت گرد ہلاک اور تیسرا فرار ہوگیا ہے جس کی تلاش کے لیے چھاپے مارے جارہے ہیں۔
پڑھیں: ’’ استنبول حملہ: جاں بحق خاتون نے موت کی پیش گوئی کردی تھی ‘‘
یاد رہے ترکی میں سال نو کے جشن کے موقع پر بھی ایک نائٹ کلب میں ملسح شخص نے فائرنگ کر کے 39 افراد کو ہلاک کیا تھا، اس حملے کی ذمہ داری شدت پسند اسلامی تنظیم داعش نے قبول کی تھی تاہم اس میں ملوث حملہ آور کو ابھی تک گرفتار نہیں کیا جاسکا۔
دوسری جانب ترک پولیس کی جانب سے گزشتہ روز دعویٰ سامنے آیا تھا کہ سیکیورٹی اداروں ازمیر میں کارروائیاں کرتے ہوئے 20 مشتبہ دہشت گردوں کو گرفتار کیا، جن کا تعلق مبینہ طور پر داعش سے ہے اور وہ وسط ایشیائی اور شمالی افریقی ممالک سے تعلق رکھتے ہیں۔
