بیلگورود: روسی شہر بیلگورود دھماکوں سے گونج اٹھا، دھماکوں میں کم از کم 5 افراد کے ہلاک ہونے کی اطلاعات ہیں۔
بین الاقوامی میڈیا کے مطابق اتوار کو بیلگورود اوبلاسٹ کے علاقائی گورنر نے میڈیا کو بتایا کہ یوکرین کی سرحد کے قریب روسی شہر بیلگورود میں کئی دھماکوں سے کم از کم پانچ افراد ہلاک اور متعدد زخمی ہو گئے۔
گورنر ویاچسلاو گلادکوف نے ٹیلی گرام میسجنگ ایپ پر پوسٹ کیا کہ کم از کم 11 رہائشی عمارتوں اور 39 گھروں کو نقصان پہنچا، جن میں سے پانچ تباہ ہو گئے ہیں۔
گورنر کے مطابق واقعے کی تحقیقات کی جا رہی ہیں، فضائی دفاعی نظام بھی متحرک ہو گیا ہے، انھوں نے بتایا کہ دھماکوں میں چار افراد زخمی ہوئے، 2 اسپتال میں داخل ہیں، جن میں ایک 10 سالہ لڑکا بھی شامل ہے۔
روئٹرز کا کہنا ہے کہ فی الوقت آزادانہ طور پر ان رپورٹس کی تصدیق نہیں کی جا سکی ہے، یوکرین کی جانب سے بھی ان اطلاعات پر فوری طور پر کوئی رد عمل سامنے نہیں آیا۔
واضح رہے کہ بیلگورود، یوکرین کی سرحد سے تقریباً 40 کلومیٹر (25 میل) شمال میں تقریباً 4 لاکھ آبادی پر مشتمل شہر ہے، جو بیلگورود اوبلاسٹ ریجن کا انتظامی مرکز ہے۔
جب سے روس نے 24 فروری کو یوکرین پر اپنا حملہ شروع کیا ہے، بیلگورود اور یوکرین کی سرحد سے متصل دیگر علاقوں پر حملوں کی متعدد اطلاعات موصول ہوئی ہیں، ماسکو بھی کیف پر حملوں کا الزام لگا چکا ہے۔
