قاہرہ: مصر کے نجی چینل نے پہلی بار بینائی سے محروم خاتون کو پروگرام کی میزبانی دے کر نئی تاریخ رقم کردی۔
تفصیلات کے مطابق مصری چینل نے اپنے پروگرام ’السفیرہ عزیزہ‘ کی میزبانی رضوی محمد نامی نابینا خاتون کو دی اور سب کو معذور افراد کی مدد کرنے کا پیغام دیا۔
خواتین کے حقوق اور تحفظ کے لیے بنائے جانے والی مصری سرکاری کونسل نے چینل کو سراہتے ہوئے کہا ہے کہ ’یہ اقدام معاشرے میں معذوری کا شکار خواتین کے لیے نئے راستے کھولے گا اور اس سے اُن کو اپنی صلاحیتوں کو سامنے لانے کا موقع بھی ملے گا‘۔
عرب میڈیا کے مطابق رضوی محمد پیدائش کے وقت معذور نہیں تھیں البتہ ڈاکٹر کی غفلت اور لاپرواہی کے باعث وہ بینائی سے محروم ہوگئیں۔
والدین کا کہنا تھا کہ ’رضوی کو پیدائش کے وقت سانس کا مسئلہ پیش آیا تو ڈاکٹر نے اُسے انتہائی نگہداشت وارڈ میں رکھا، آکسیجن باکس میں گیس کا تناسب زیادہ ہونے کی وجہ سے بچی کی بینائی متاثر ہوئی اور اُسے ہمیشہ کے لیے نظر آنا بند ہوگیا‘۔
مزید پڑھیں: آرمی چیف کا لاہور کی باہمت بیٹی فجر کو نوکری اور مزید تعلیم کا موقع دینے کا اعلان
رضوی محمد نے معذوروں کے مقامی اسکول سے ابتدائی تعلیم حاصل کی بعد ازاں انہوں نے اعلیٰ ثانوی بورڈ کے امتحان میں 98 فیصد نمبر حاصل کر کے اول پوزیشن حاصل کی۔
مذکورہ خاتون نے گریجویشن کی تعلیم مکمل کرنے کے بعد ریڈیو پروگرام میں بطور ہوسٹ اپنے فرائض انجام دیے، مختصر وقت میں یہ پروگرام شہرت حاصل کرگیا جس کے بعد رضوی کو ٹی وی چینل کی انتظامیہ نے پروگرام کی میزبانی دینے کا فیصلہ کیا۔
العربیہ سے گفتگو کرتے ہوئے رضوی کا کہنا تھا کہ ’بینائی نہ ہونے کی وجہ سے کافی مشکلات آئیں مگر اہل خانہ نے تعلیمی میدان سے لے کر ہر جگہ نہ صرف ساتھ دیا بلکہ حوصلہ افزائی بھی کی‘۔
اُن کا کہنا تھا کہ ’والدہ اس بات پر زور دیا کرتی تھیں کہ تمھاری آواز میں ایک نکھار ہے اسے ریکارڈ کرتی رہو ایک دن ضرور کامیاب ہوگی‘۔
