واشنگٹن: امریکا نے وزیر خارجہ انتونی بلنکن کے دورہ بھارت کا اعلان کر دیا، جنوبی ایشیا کے اہم دورے میں پاکستان کو ایک بار پھر نظر انداز کر دیا گیا ہے۔
تفصیلات کے مطابق امریکی وزیر خارجہ انتونی بلنکن 26 سے 29 جولائی تک بھارت اور کویت کا دورہ کریں گے، اس دورے کا مقصد شراکت داری کو مزید مضبوط بنانا ہے۔
امریکی محکمہ خارجہ کی جانب سے جاری اعلامیے میں کہا گیا ہے کہ امریکی وزیر خارجہ بھارتی وزیر اعظم نریندر مودی اور وزیر خارجہ سبرامنیم سے ملاقاتیں کریں گے، جن میں علاقائی سیکیورٹی، کرونا وبا، اور ماحولیاتی تبدیلی پر تبادلہ خیال ہوگا۔
اعلامیے کے مطابق امریکی وزیر خارجہ انتونی بلنکن 28 جولائی کو کویت پہنچیں گے، جہاں وہ کویتی رہنماؤں کے ساتھ 60 سالہ سفارتی تعلقات کی اہمیت پر بات چیت کریں گے۔
روئٹرز کے مطابق امریکی وزیر خارجہ چین کا راستہ روکنے کی کوششوں اور ویکسین سفارت کاری میں بھارت کے ایک اہم پارٹنر ہونے کے ناطے نئی دہلی کا دورہ کریں گے، یہ بلنکن کا صدر جو بائیڈن کے وزیر خارجہ کے طور پر بھارت کا پہلا دورہ ہوگا۔
جمعے کو میڈیا سے گفتگو کرتے ہوئے بلنکن نے کہا کہ کرونا وبا سے جنگ میں بھارت کی حالت بہت نازک ہے، جس کی وجہ سے یہ آخر کار دنیا کو ویکسینز کا ایک اہم ذریعہ بن جائے گا۔
