جسم میں خون کی روانی زندگی کا دوسرا نام ہے جو غذائی اجزاء اور آکسیجن سمیت ہر چیز کو دل، دماغ، مسلز اور جلد تک پہنچاتا ہے اور خون کی گردش کے نظام میں کوئی خلل واقع ہوجائے تو سارا نظام بے ترتیب ہوجاتا ہے۔
اس بات پر یقین کرنا مشکل ہوگا مگر ہمارا جسم 60 ہزار میل تک پھیلی خون کی شریانوں کو سنبھالے ہوئے ہے، دل اور دیگر پٹھوں کے ساتھ یہ شریانیں خون کی گردش کا نظام تشکیل دیتی ہیں۔
اگر اس خون کی روانی سست ہوجائے تو جسم کے مختلف اعضاء اور پٹھوں کو خون کی مطلوبہ مقدار نہیں ملتی جس کی وجہ سے ان میں درد ہونے لگتا ہے یا جب ہم رات کو سونے لگتے ہیں تو ٹانگوں میں بے چینی سی محسوس ہونے لگتی ہے۔
کبھی ایسا بھی ہوتا ہے کہ ٹانگوں میں درد، چیونٹیاں رینگنے کا احساس اور ٹانگوں کے پٹھوں میں کھچاوٹ محسوس ہوتی ہے، ٹانگوں کو حرکت دینے سے یہ علامات وقتی طور پر دور ہوجاتی ہیں لیکن کچھ دیر بعد دوبارہ لوٹ آتی ہیں۔
اس بیماری میں کسی بھی عمر کے لوگ مبتلا ہوسکتے ہیں، یہ علامات رات کو سونے کے علاوہ پرسکون ہوکر بیٹھنے پر بھی ظاہر ہوجاتی ہیں۔ ماہرین صحت کا کہنا ہے کہ اگرایسی علامات مستقل ظاہر ہوں تو یہ تشویشناک بات ہے کیونکہ یہ گردوں کے فیل ہونے، ذیابیطس اور اعصابی کمزوری کی جانب اشارہ ہے۔
ماہرین طب کا کہنا ہے کہ اس طرح کی بیماری کی ایک وجہ آئرن کی کمی بھی ہے جبکہ دیگر وٹامن منرلز جیسے پوٹاشیم اور میگنیشیم کم ہونے سے بھی اس طرح کی علامات ظاہر ہوسکتی ہیں۔
اس کے ساتھ ہی جو لوگ تیزابیت کم کرنے والی ادویات کااستعمال کرتے ہیں ان کے جسم میں آئرن جذب نہیں ہوتا جس کی وجہ سے آئرن کی کمی ہونے لگتی ہے۔
ماہرین کے مطابق ادویات استعمال کرنے کے بجائے اپنے جسم میں تیزابیت کم کرنے کے لئے چائے، کافی اور سگریٹ چھوڑ دیں۔ اس بیماری کی ایک وجہ دوران خون کی خرابی بھی ہے، لہٰذا ضروری ہے کہ ایسی ہلکی پھلکی ورزشیں یا حرکات کی جائیں جن سے شریانوں میں خون کی روانی چلتی رہے۔ اگر آپ بیٹھ کر کام کرتے ہیں تو کام کے دوران تھوڑی دیر کھڑے ہوجائیں اور چلنے پھرنے کی عادت ڈالیں۔ اسی طرح ہلکی پھلکی ورزش اور سیر کی عادت اپنائیں۔
ایسے لوگوں کو چاہیے کہ دوا کے ساتھ روغن زیتون مغزیات سے تیار شدہ روغن سے ٹانگوں کی مالش کریں، اس مساج کے ذریعے آپ کے بدن میں ایک نئی جان اور پھرتی آجائے گی اور خود کو چست توانا تندرست اور جوان محسوس کریں گے۔
اس کے علاوہ رات کو سونے سے قبل اپنے پاؤں کے نیچے سرسوں یا زیتون کا تیل لگا کر مالش کرکے سونے سے بھی آپ کو ٹانگوں اور پنڈلیوں کے درد میں آرام مل سکتا ہے۔
کمر اور ٹانگوں کے درد سے نجات کیلئے پچاس گرام ہلدی اور پانچ گرام کچور ملا لیں اور صبح و شام چھوٹا چمچ چائے والا دودھ کے ساتھ استعمال کریں۔
اس کے علاوہ صحت بخش غذا خون کے بہاؤ یا گردش کو بہترین بنانے کا ایک ذریعہ ہے جبکہ ورزش، مناسب مقدار میں پانی پینا، جسمانی وزن کو کنٹرول میں رکھنا اور تمباکو نوشی سے گریز بھی اہم ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نوٹ : مندرجہ بالا تحریر معالج کی عمومی رائے پر مبنی ہے، کسی بھی نسخے یا دوا کو ایک مستند معالج کے مشورے کا متبادل نہ سمجھا جائے۔