اسلام آباد: بلوچستان عوامی پارٹی کے صدر جام کمال نے کہا ہے کہ عمران خان سے مثبت ملاقات ہوئی ہے، امید کی کرن نظر آتی ہے، غیر مشروط طور پر پی ٹی آئی کی حمایت کا اعلان کیا ہے، اچھے اتحادی کے طور پر بلوچستان حکومت کا حصہ بنیں گے۔
ان خیالات کا اظہار انہوں نے عمران خان سے ملاقات کے بعد پی ٹی آئی رہنماؤں کے ہمراہ میڈیا سے گفتگو کرتے ہوئے کیا، جام کمال نے کہا کہ سینیٹ کے الیکشن سے اتحاد کیا اور آج اس کے ثمرات نظر آرہے ہیں، بلوچستان کی ترقی اور پاکستان کی ترقی کے لیے پی ٹی آئی بہترین آپشن ہے۔
صدر بلوچستان عوامی پارٹی نے کہا کہ بلوچستان میں ون یونٹ کے ساتھ چلیں گے، بہترین کوآرڈینیشن ہوگی، بلوچستان کے سیاسی معاملات کا حل نکالیں گے، ماضی میں بہت کچھ ہوا ہے لیکن اب تبدیلی کی طرف جانا چاہئے، بہتری کے لیے ایک دوسرے کی مدد کریں گے اور آگے بڑھیں گے۔
جام کمال نے کہا کہ عمران خان اور پارٹی قیادت کی جانب سے گرمجوشی سے استقبال کیا گیا، بی اے پی بلوچستان میں بڑے نمبرز کے ساتھ موجود ہے، بلوچستان میں عددی اکثریت سے بھی آگے بڑھ چکے ہیں۔
بلوچستان میں اتحادی حکومت ہوگی، مل جل کر کام کریں گے، جہانگیر ترین
پی ٹی آئی رہنما جہانگیر ترین نے کہا کہ بنی گالا آنے والوں کے شکر گزار ہیں، خوش آمدید کہتے ہیں، قوم کو مبارکباد دیتا ہوں تمام معاملات طے کرلیے گئے ہیں، بلوچستان میں اتحادی حکومت ہوگی مل جل کر کام کریں گے۔
جہانگیر ترین نے کہا کہ بلوچستان تبدیلی کے لیے تیار ہے، عوام کو خوشخبری دیتے ہیں، بی اے پی کا حق ہے کہ وزیر اعلیٰ بلوچستان ان کا ہو، جام کمال کو وزیر اعلیٰ بلوچستان کے لیے نامزدگی کی حمایت کرتے ہیں۔
جہانگیر ترین نے کہا کہ ایم کیو ایم کے وفد سے ملاقات ہوئی، کراچی کے ایشو حل کرنا چاہتے ہیں، امید ہے ایم کیو ایم وفاق میں پی ٹی آئی کی حمایت کرے گی۔
مثبت سوچ بلوچستان کی ترقی میں اہم کردار ادا کرے گی، شاہ محمود قریشی
پی ٹی آئی رہنما شاہ محمود قریشی نے کہا ہے کہ بلوچستان میں پہلی مرتبہ ایسی قیادت آرہی ہے جو مرکز سے تعلقات چاہتی ہے، مثبت سوچ بلوچستان کی ترقی میں اہم کردار ادا کرے گی۔
شاہ محمود قریشی نے کہا کہ ہم نے مل کر چلنے کا فیصلہ کیا ہے، وفاق بھرپور مدد کرے گا، کچھ عناصر ایسے ہیں جو بلوچستان کو عدم استحکام کا شکار دیکھنا چاہتے ہیں، بلوچستان میں استحکام اور خوشحالی و ترقی کے لیے بھرپور مدد کریں گے، مرکز میں پی ٹی آئی کی عددی اکثریت ہے۔
پروپیگنڈے کو رد کرتا ہوں، عمران خان کا فیصلہ قبول کریں گے، پرویز خٹک
پی ٹی آئی رہنما اور سابق وزیر اعلیٰ خیبرپختونخوا پرویز خٹک نے کہا ہے کہ پروپیگنڈے کو رد کرتا ہوں، عمران خان کا فیصلہ قبول کریں گے، عمران خان ہمارے لیڈر ہیں جو بھی فیصلہ کریں گے قبول کریں گے۔
