لندن: برطانوی وزیراعظم بورس جانسن کا کہنا ہے کہ برطانیہ سب سے پہلے دفاع کے لیے یوکرین کو ہتھیار بھیجے گا۔
غیرملکی خبررساں ادارے کی رپورٹ کے مطابق روس یوکرین تنازع پر برطانوی وزیراعظم بورس جانسن نے قوم سے خطاب کرتے ہوئے کہا کہ روس نے ناصرف یوکرین بلکہ مغربی روایات پر حملہ کیا ہے، ہم یوکرین کے عوام کو تنہا نہیں چھوڑیں گے۔
بورس جانسن نے کہا کہ خدشات درست ہوئے پیوٹن نے یورپ پر جنگ مسلط کردی، پیوٹن نے بغیر کسی جواز کے دوست ملک پر حملہ کیا ہے۔
برطانوی وزیراعظم نے کہا کہ بےگناہ عوام پر میزائل اور بم گرائے جارہے ہیں، بری، بحری اور فضائی راستوں سے یوکرین پر حملہ کیا جارہا ہے۔
انہوں نے کہا کہ دنیا کسی صورت ان آزادیوں کو سلب نہیں ہونے دے گی، اتحادیوں کے ساتھ مل کر روس پر معاشی پابندیاں لگائیں گے، یوکرین کے وزیراعظم کو ٹیلی فون کرکے حمایت کا یقین دلایا ہے۔
یوکرین کے کون کون سے شہر روسی حملوں کی زد میں ہیں؟
روس نے یوکرینی دارالحکومت سمیت کئی شہروں پر بیلسٹک اور کروز میزائل داغ دیے، شہری جانیں بچانے کے لیے زیر زمین ریلوے اسٹیشنز میں پناہ لینے پر مجبور ہوگئے۔
مشرقی یورپ پر منڈلاتے جنگ کے بادل باالآخر یوکرین پر روسی میزائلوں کی صورت میں برس پڑے۔ 24 فروری کا سورج طلوع ہوتے ہی روس نے پڑوسی ملک پر حملہ کرکے اہم تنصیبات اور علاقوں کو نقصان پہنچای۔
رپورٹ کے مطابق ماریوپول اور اڈیسہ میں روسی فوج داخل ہوچکی ہے جب کہ کیف میں ملٹری کمانڈ سینٹرز پر بم گرائے گئے۔ یوکرینی صدر کا کہنا ہے کہ ہم پر جنوب، شمال اور مشرق حتیٰ کہ ہوا سے بھی حملہ کیا جارہا ہے، جو بھی ملک کا دفاع کرنا چاہے ہم اسے ہتھیار دیں گے کیوں کہ ہمارا مستقبل تمام شہریوں پر منحصر ہے۔
روسی حملے کے دوران حکومت کی جانب سے جنوبی اڈیسہ میں چھ یوکرینی شہریوں کے ہلاک اور سات کے زخمی ہونے کی تصدیق کی گئی۔
یوکرین کی اسٹیٹ ایمرجنسی سروس کا کہنا ہے کہ روسی فوجیوں نے ملک کے شمال میں واقع دو گاؤں پر مکمل طور پر قبضہ کرلیا ہے جب کہ سرکاری ویب سائٹس پر بڑے پیمانے پر سائبر حملہ بھی کیا ہے۔
