لندن : برطانیہ کے وزیراعظم بورس جانسن نے دفتر سنبھالنے کے بعد خطاب میں کہا کہ لاک ڈاؤن پر عملدرآمد، عوام کا شکرگزار ہوں، لاک ڈاؤن میں نرمی یاہٹائے جانے پرکوئی تاریخ نہیں دے سکتا، ہم وائرس کو شکست دینے کے قریب ہیں۔
تفصیلات کے مطابق برطانیہ کے وزیراعظم بورس جانسن نے کورونا سے صحت یابی کے بعد فرائض کی انجام دہی کا آغاز کردیا ،دفتر سنبھالنے کے بعد خطاب میں کہا کہ کوروناکےخلاف عوام نےیکجہتی کامظاہرہ کیا، کوئی شک نہیں برطانوی عوام کوروناکوشکست دیں گے۔
بورس جانسن کا کہنا تھا کہ لاک ڈاؤن پر عملدرآمد پر عوام کا شکرگزار ہوں، ابھی لاک ڈاؤن میں نرمی نہیں کریں گے، وبا کا دوسرا مرحلہ زیادہ خطرناک ہو سکتا ہے، یہ وبا دوسری جنگ عظیم کےبعد سب سے بڑے چیلنج کا سامنا ہے۔
برطانوی وزیراعظم نے مزید کہا کہ لاک ڈاؤن میں نرمی یاہٹائے جانے پرکوئی تاریخ نہیں دے سکتا، ہم نے وینٹی لیٹرز اور آئی سی یو کی کمی نہیں ہونے دی، ہم سب نے مل کر این ایچ ایس کو بچا لیا ہے، ہم وائرس کو شکست دینے کے قریب ہیں۔
یاد رہے برطانوی وزیر خارجہ ڈومینک راب نے معاشی دباؤ کے باوجود برطانوی لاک ڈاؤن میں نرمی کرنے سے انکار کرتے ہوئے کہا تھا کہ لاک ڈاؤن انتہائی حساس موڑ پر ہے، نرمی کرنا ممکن نہیں۔
خیال رہے کہ برطانوی وزیر اعظم کرونا وائرس کا شکار ہوگئے تھے، ان کی حالت بگڑنے پر انہیں 3 دن انتہائی نگہداشت کے وارڈ (آئی سی یو) میں رکھا گیا تھا۔
تاہم انہوں نے کرونا وائرس کو شکست دی اور اب جلد ہی سرکاری ذمہ داریاں سنبھال لیں گے، ان کی بیماری کے دوران دنیا بھر کے لیڈرز نے ان کے لیے دعائیہ پیغامات بھجوائے۔
برطانیہ میں مجموعی طور پر اب تک 1 لاکھ 45 سے زائد افراد کرونا وائرس سے متاثر ہوچکے ہیں، جبکہ 20 ہزار سے زائد اموات بھی ہوچکی ہیں۔
