The news is by your side.

Advertisement

پرل بیلٹ فائٹ: عامر خان نے بھارتی باکسر کا چیلنج قبول کرلیا

کراچی: پاکستانی نژاد برطانوی باکسر عامر خان نے بھارتی باکسر کے چیلنج کو قبول کرتے ہوئے جدہ میں فائٹ کا اعلان کردیا۔

تفصیلات کے مطابق کراچی میں باکسر عامر خان اور بل ڈو سانج نے پریس کانفرنس کی جس میں پاکستانی نژاد برطانوی باکسر کا کہنا تھا کہ بھارتی باکسر نے مجھے چیلنج دیا کہ سرحد پر کیوں لڑتے ہیں آئیں رنگ میں مقابلہ کرتے ہیں۔

عامر خان کا کہنا تھا کہ پاک بھارت بارڈر کی جنگ میں کئی معصوم لوگ جان گنوا چکے ہیں، دونوں ممالک کے باکسر جدہ میں مدِ مقابل آکر پاک بھارت تعلقات کو بہتر بنانے کی کوشش کریں گے، میرے لیے یہ مقابلہ آسان نہیں ثابت ہوگا مگر پوری کوشش کروں گا کہ پہلے پاکستان اور پھر انگلینڈ کا جھنڈا بلند کروں۔

مزید پڑھیں: باکسر عامر خان کا امریکی حریف ٹیرنس کرافورڈ سے مقابلہ

پاکستانی نژاد برطانوی باکسر کا کہنا تھا کہ بھارت میں پریس کانفرس کے بعد شائقین کی بڑی تعداد نے مجھ سے ملاقات کی اور بہت زیادہ خوش آئند ہے، میں انجری سے صحت یاب ہوچکا اور جلد ٹریننگ کا آغاز کروں گا۔

انہوں نے بتایا کہ بھارتی باکسر نیرج گویات نے مجھے پرل بیلٹ کے لیے فائٹ کرنے کا چیلنج دیا، انہوں نے خود کہا کہ بارڈر پر کیوں لڑتے ہیں رنگ میں آمنے سامنے آجائیں۔ پاکستانی نژاد برطانوی باکسر عامر خان اور ڈبلیو بی سی ایشین چیمپئن نیرج گویات کی فائٹ 12 جولائی کو جدہ میں ہوگی۔

عامر خان کے پروموٹر بل ڈوسانج کا کہنا تھا کہ یہ ایشیا کی ایک بڑی فائٹ ثابت ہونے جارہی ہے، جو ڈبلیو بی سی پرل بیلٹ کے لیے لڑی جائے گی، عامر خان اولمپیئن اور دو مرتبہ کے عالمی چیمپئن ہیں، یہ مسلم باکسر کے لحاظ سے تاریخ ساز مقابلہ رہے گا کیونکہ لیجنڈری باکسر محمد علی کو بھی جدہ میں لڑنے کا کبھی موقع نہیں ملا۔

یہ بھی پڑھیں: باکسر عامر خان رنگ میں اترنے کے لیے تیار

ڈوسانج کا کہنا تھا کہ عامر خان اور نیرج گویات کا مقابلہ ایک نئی تاریخ رقم کرے گا، عامر خان  جدہ ٹائیگرز اور بھارتی باکسر جدہ شارکس کی نمائندگی کریں گے۔

Comments

comments

یہ بھی پڑھیں