ابوظبی: سعودی عرب سے بھارتی شہر کیرالہ جانے والی پرواز نے چار سالہ ہندوستانی بچے کو مرگی کا دورہ پڑنے کے سبب ہنگامی لینڈنگ کی ، تاہم بچه جانبر نہ ہو سکا۔
تفصیلات کے مطابق بھارتی خاندان سعودی عرب میں عمرے کی ادائیگی کرنےکے بعد اومان ایئر کی فلائٹ سے واپس اپنے وطن جارہے تھے کہ بچے کو مرگی کا دورہ پڑا جو کہ 45 منٹ تک جاری رہا ہے ۔
خلیج ٹائم کے مطابق چار سالہ یحیٰ پوتھیاپورائل کو اس وقت دورہ پڑ ا جب اومان ایئر کی جدہ سے کیرا لہ جانے والی پرواز ٹیک آف کرچکی تھی ۔ بچے کی حالت نہ سنبھلنے پر فلائٹ کپتان نے ابو ظبی میں ایمرجنسی لینڈنگ کا فیصلہ کیا۔
بچے کے ابوظبی میں مقیم رشتے دار محمد نادر کا کہنا ہے کہ بچے کو پڑنے والا دورہ 45 منٹ تک جاری رہا اور بالاخر اس نے اپنی ماں کی بانہوں میں دم توڑدیا۔ بچے کے والدین صدمے سے بے حال ہیں۔ انہوں نے مزید بتایا کہ یہ یحیٰ ایک خصوصی بچہ تھا جو کہ نہ بول سکتا تھا اور نہ ہی چل سکتا تھا۔ وہ اپنے خاندان کے تیرہ ارکان کے ساتھ عمرے کی سعادت کے لیے سعودی عرب آیا تھا۔
محمد نادر کا کہنا تھا کہ جب پرواز شروع ہوئی اس وقت بچے کو ہلکا بخار تھا ، تاہم درمیان میں اسے مرگی کا دورہ پڑا۔ مرگی کا یہ دورہ بچے کے لیے جان لیوا ثابت ہوا۔ یحیٰ محمدعلی اور جییره نامی خاتون کا بیٹا تھا اور تین بچوں میں سب سے چھوٹا تھا۔
بھارتی ایمبیسی کےمطابق بچے کی میت کو منگل کی صبح اتحاد ایئر لائن کی فلائٹ سے بھارت روانہ کیا گیا جہاں اس کے آبائی علاقے کنور میں اس کی تدفین کی گئی۔
