کم عمر نوجوانوں کو ساری رات جاگنے اور اسمارٹ فون پر سرچنگ کرنے پر والدین سے کئی باتیں سننی پڑ جاتی ہیں تاہم ایسے ہی ایک نوجوان کی اس عادت نے 75 افراد کی جان بچا لی۔
یہ واقعہ بھارتی ریاست مہاراشٹر میں پیش آیا جہاں ساری رات جاگ کر ویب سیریز دیکھنے والے 18 سالہ نوجوان نے بروقت درجنوں افراد کو ہوشیار کردیا جب اس نے عمارت کو گرتا ہوا محسوس کیا۔
کنال موہت نامی یہ نوجوان اس رات ایک ویب سیریز دیکھ رہا تھا جب 4 بجے کے قریب اس نے اپنے گھر کے کچن کی چھت کو جھڑتے ہوئے دیکھا۔ کنال نے فوراً اپنے گھر والوں کو نیند سے جگایا اور عمارت میں رہائش پذیر دیگر افراد کو بھی الرٹ کیا۔
اس دوران عمارت کے مختلف حصے گرنا شروع ہوگئے تاہم عمارت مکمل طور پر منہدم ہونے سے پہلے تمام افراد بحفاظت باہر نکل آئے۔
Maharashtra: 75 occupants of a 2-storey building in Kopar, Dombivli saved by a young boy as building collapsed on 29th Oct early morning.
"While watching web-series till dawn, I saw part of kitchen falling down & alerted everyone to vacate the building,” says 18-yr old Kunal pic.twitter.com/p2b6qOMSr2
— ANI (@ANI) October 30, 2020
عمارت میں تقریباً 75 کے قریب افراد رہائش پذیر تھے جو کنال کے سو جانے کی ضرورت میں موت کی وادی میں جاسکتے تھے۔ خود کنال بھی اگر سو رہا ہوتا تو دوبارہ کبھی نیند سے نہ اٹھتا۔
مقامی حکام کا کہنا ہے کہ اس عمارت کو 9 ماہ قبل خطرناک قرار دیا گیا تھا اور رہائشیوں سے کہا گیا تھا کہ وہ اس عمارت کو خالی کردیں۔
تاہم یہاں رہنے والے نہایت غریب ہیں اور کسی دوسری جگہ منتقل ہونے کی استطاعت نہیں رکھتے۔
واقعے کے بعد کنال مقامی افراد کے درمیان ہیرو کی حیثیت اختیار کر گیا، یقیناً اس کے والدین اب اسے رات بھر جاگنے پر کبھی لیکچر نہیں دیں گے۔