بھارت کے مختلف بازاروں میں ترکیہ سے درآمد شدہ سیبوں کا بائیکاٹ کیا جا رہا ہے جبکہ ایران کے سیبوں کی مانگ بڑھ گئی۔
انڈین میڈیا کی رپورٹس کے مطابق سیبوں کے بائیکاٹ کے ساتھ ساتھ بھارتی شہریوں نے Ixigo اور EaseMyTrip سمیت کئی پلیٹ فارمز پر اپنی فلائٹس اور ہوٹل کی بکنگ منسوخ کروائی۔
مختلف بازاروں میں ترکیہ کے سیب غائب ہیں جس کے نتیجے میں ایران سے درآمد سیبوں کی مانگ کے ساتھ ساتھ ان کے نرخ بھی بڑھ گئے۔
10 کلو سیب کی تھوک قیمت میں 200 سے 300 روپے جبکہ ریٹیل میں 20 سے 30 روپے فی کلو اضافہ ہوا ہے۔
بھارت نے رات کے اندھیرے میں پاکستان میں بزدلانہ کارروائی کرتے ہوئے کئی شہریوں کو شہید کیا جبکہ پاکستان نے آپریشن بنیان مرصوص کے تحت دشمن پر بھرپور جوابی وار کیا جس سے اس کے ہوش ٹھکانے آگئے۔
پاک بھارت کشیدگی سے متعلق تمام خبریں
پاکستان اور بھارت کے درمیان جنگ میں ترکیہ، چین، سعودی عرب، متحدہ عرب امارات، آذربائیجان سمیت کئی ممالک نے پاکستان کا ساتھ دیا جبکہ بھارت عالمی سطح پر تنہا نظر آیا۔
پاکستان کا ساتھ دینے پر بھارتی شہری ترکیہ سے انتقام لینے کے تحت اس کے سیبوں، ملکی دورے اور دیگر اشیا کا بائیکاٹ کر رہے ہیں۔
