The news is by your side.

Advertisement

میری اولین ترجیح پاکستان میں فٹبال کو دوبارہ منظم کرنا ہے، برازیلی کوچ

کراچی: پاکستانی فٹبال ٹیم کے برازیلی کوچ ہوزے انتونیو نوگیرا نے کہا ہے کہ پاکستانی فٹبالرز پر بہت کام ہونا ہے، میری اولین ترجیح پاکستان میں فٹبال کو دوبارہ منظم کرنا ہے۔

تفصیلات کے مطابق پاکستان فٹبال فیڈریشن نے تین سال سے بین الاقوامی مقابلوں میں شرکت سے محروم رہنے والی پاکستانی ٹیم کی دوبارہ تیاری کے لیے برازیل سے تعلق رکھنے والے کوچ ہوزے انتونیو نوگیرا کی خدمات حاصل کی ہیں۔

برازیلی کوچ ہوزے انتونیو نوگیرا نے گزشتہ دنوں کراچی میں ہونے والے ٹورنامنٹ میں کھلاڑیوں کی کارکردگی کا جائزہ لیا جس کے بعد ٹورنامنٹ سے منتخب کھلاڑیوں کو کیمپ میں بلایا جائے گا، برازیلی کوچ نے کہا کہ ان کا پہلا ہدف اس سال ساف چیمپئن اور ایشین گیمز کے لیے ٹیم تیار کرنا ہے۔

ہوزے انتونیو نوگیرا نے کہا ہے کہ پاکستانی فٹبال ٹیم کی کوچنگ بڑی ذمہ داری ہے جس کے لیے میں تیار ہوں، چیلنج قبول کرنے والا شخص ہوں، مجھے پتہ ہے کہ آپ کے ملک کی فٹبال تین سال سے رکی ہوئی ہے، فیفا عالمی رینکنگ میں پاکستان کی پوزیشن 205 ہے، پاکستانی فٹبالرز پر بہت کام ہونا ہے۔

برازیلی کوچ کے مطابق ان کی کوشش ہے کہ اگلے سال تک ناصرف رینکنگ میں بہتری آئے بلکہ پاکستانی ٹیم اپنے علاقائی خطے میں بھی اچھی کارکردگی دکھانے کے قابل ہوسکے، پاکستانی فٹبالرز کا سب سے بڑا مسئلہ فٹنس اور تکنیک ہے، آج کل کی فٹبال بہت تیز ہوچکی ہے ہمیں اس جانب توجہ دینی ہوگی۔

ان کا کہنا تھا کہ سیاست اور فٹبال ایک سال نہیں چل سکتے، پاکستان میں فٹبال کے معاملات عدالت میں رہے ہیں، جب یہ معاملات حل ہوگئے اس کے بعد ہی کوچ بننے پر رضامندی ظاہر کی، اب ہمیں فٹبال کی بہتری کے لیے سوچنا چاہئے۔


خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

Comments

comments

یہ بھی پڑھیں