کرائسٹ چرچ : کرائسٹ چرچ مساجد میں حملہ کرنے والے برینٹن ٹرینٹ کی کزن نے سزائے موت کی حمایت کرتے ہوئے کہا اتنے لوگوں کی جان لینے والا موت کا حقدار ہے۔
تفصیلات کے مطابق کرائسٹ چرچ کی مساجد میں دہشت گرد حملے کے ملزم برینٹن ٹرینٹ کی کزن کا کہنا ہے جوکچھ اس نے کیا اس پروہ موت کا حقدار ہے، انصاف یہی ہے کہ اتنے لوگوں کی جان لینے والے کے ساتھ بھی وہی کیا جائے جواس نے ان لوگوں کے ساتھ کیا۔
یاد رہے گذشتہ جمعے نیوزی لینڈ کے علاقے کرائسٹ چرچ میں سفید فام شخص نے دو مساجد پر اُس وقت فائرنگ کی تھی کہ جب وہاں نمازِ جمعہ کی ادائیگی کے لیے مسلمانوں کا اجتماع شروع ہونا تھا۔
فائرنگ کے واقعے میں 49 مسلمان شہید جبکہ متعدد نمازی شدید زخمی ہوئے، ملزم نے اپنے گھناؤنے عمل کی ویڈیو سوشل میڈیا پر براہ راست نشر کی تھی۔
مرکزی حملہ آور کی شناخت 28 سالہ برینٹن ٹیرنٹ کے نام سے ہوئی ہےاور وہ آسٹریلوی شہری تھا، جس کی تصدیق آسٹریلوی حکومت نے بھی کی تھی۔
مزید پڑھیں : کرائسٹ چرچ: مساجد پر حملہ کرنے والا دہشت گرد عدالت میں پیش
غیر ملکی خبر رساں ادارے کا کہنا تھا کہ برینٹن ٹیرینٹ کو ایک روز قبل عدالت میں پیش کردیا گیا جہاں اس پر قتل کے جرم میں فرد جرم عائد کی گئی تھی اور عدالت نے مرکزی ملزم کا 5اپریل تک ریمانڈ منظور کرلیا تھا۔
بعد ازاں نیوزی لینڈ کے شہر کرائسٹ چرچ میں مساجد پر دہشت گردی کے خوفناک حملے کے بعد وزیر اعظم اور کایبینہ کی جانب سے اسلحہ کنٹرول قوانین میں تبدیلی کا اعلان کیا گیا تھا۔
جیسنڈا آرڈن کا کہنا تھا کہ سفید فام قوم پرستی پوری دنیا کو درپیش بڑا مسئلہ ہے۔
