بھارت میں شادی کے موقع پر مضحکہ خیز ویڈیو اکثر وائرل ہوتی رہتی ہیں جنہیں دیکھ کر مداح دنگ رہ جاتے ہیں۔
ایسی ہی ایک ویڈیو سوشل میڈیا پر وائرل ہورہی ہے جس میں ایک دلہن تعلیم حاصل کرنے کی جستجو میں مگن شادی کے روز ہی عروسی لباس میں شوہر کو ساتھ لے کر امتحان دینے پہنچ گئی۔
بھارتی میڈیا کے مطابق راج کوٹ سے تعلق رکھنے والی شیوانگی پارلر سے تیار ہوکر شادی ہال جانے کی بجائے دلہا اور اپنے گھر والوں کے ہمراہ سیدھا امتحانی کمرے میں پہنچی۔
شیوانگی نجی جامعہ سے بیچلرز کررہی ہے اور سوشل ورک کے پانچویں سمسٹر میں زیر تعلیم ہیں۔
دلہن کا کہنا تھا کہ ان کے لیے امتحان دینا بہت ضروری تھا جب شادی کی تاریخ رکھی گئی تو امتحانات کا شیڈول نہیں آیا تھا لیکن بعد میں پتا چلا کہ ان کا ایک پرچہ شادی کے روز ہے۔
شیوانگی نے بتایا کہ امتحانات کی تاریخ معلوم ہونے کے بعد انہوں نے گھر والوں سے اس بات کا تذکرہ کیا اور بتایا کہ وہ شادی والے دن ہی پرچہ دینا چاہتی ہے جس پر گھر والوں نے بھی کوئی اعتراض نہیں کیا۔
دلہن کی یہ ویڈیو سوشل میڈیا کے کئی پلیٹ فارمز پر وائرل ہے جس پر صارفین شیوانگی اور ان کے ہونے والے شوہر کے فیصلے کو سراہ رہے ہیں۔
