اسلام آباد: دفاعی تجزیہ نگار بریگیڈیئر(ر)اسدمنیرکی تدفین مقامی قبرستان میں کردی گئی، اہل خانہ نے مرحوم کا پوسٹ مارٹم نہ کرنے کی درخواست کی تھی جس کو منظور کرلیا گیا تھا۔
تفصیلات کے مطابق دفاعی تجزیہ نگار بریگیڈیئر ریٹائرڈ اسدمنیر اپنے کمرے میں مردہ پائے گئے، ان کی لاش ڈپلومیٹک انکلیو سے ملی، جس کے بعد اہل خانہ نے اُسے پمز اسپتال منتقل کیا۔
اسد منیر کا نماز جنازہ ایچ ایٹ فور میں ادا کیا گیا جس میں اہل خانہ سمیت اُن کے دوست احباب نے شرکت کی، بعد ازاں مقامی قبرستان میں اُن کی تدفین کردی گئی، اہل خانہ نے مرحوم کا پوسٹ مارٹم نہ کرنے کی درخواست کی تھی جس کے باعث قانونی کارروائی عمل میں نہیں لائی گئی۔
پولیس ذرائع کا کہنا تھا کہ بریگیڈیئر (ر)اسد منیر نیب کی جانب سےجاری تحقیقات پر پریشان تھے، نیب کی جانب سے ان پر اختیارات کا ناجائز استعمال کرتے ہوئے ایف 11 میں پلاٹ بحال کرنے کا الزام تھا۔ بریگیڈیئر ریٹائرڈاسد منیرسی ڈی اے میں ممبراسٹیٹ بھی رہ چکے ہیں۔
ذرائع کے مطابق بریگیڈیئر (ر) اسد منیر نے گذشتہ رات پنکھے کے ساتھ لٹک کر خودکشی کی، پولیس نے رات کو لاش تحویل میں لے کر اسپتال منتقل کر دیا تھا۔
پولیس کا کہنا ہے کہ اسد منیر کے خودکشی کرنے کی وجہ ابھی تک سامنے نہیں آئی۔ خاندانی ذرائع نے پولیس کو اپنے بیان میں کہا کہ اسد منیر نے کہا تھا کہ یہ نیب میرا پیچھا کیوں نہیں چھوڑتا۔
خاندانی ذرائع کے مطابق اسد منیر میڈیا پر چلنے والی خبروں پر کافی پریشان تھے، گزشتہ روز قومی احتساب بیورو (نیب) ایگزیکٹو بورڈ اجلاس میں اسد منیر کے خلاف ریفرنس دائر کرنےکی منظوری دی گئی تھی۔
دوسری جانب بریگیڈئیر (ر)اسد منیر کی لاش ورثا کے حوالے کردی گئی، لاش بیٹے نے وصول کی، ترجمان پمز اسپتال کا کہنا ہے کہ لواحقین نے پوسٹ مارٹم کرنے کی اجازت نہیں دی، واحقین کی درخواست پر ڈپٹی کمشنر اسلام آباد نے پوسٹ مارٹم روکا۔
دوسری جانب بلاول بھٹو نے بریگیڈیئر ریٹائرڈ اسد منیر کی مبینہ خودکشی کی خبر پر سماجی رابطے کی ویب سائٹ ٹوئٹر پر کہا اسد منیر کے انتقال کی خبر پریشان کن ہے، دعا ہے اللہ خاندان کو صدمہ برداشت کرنے کی ہمت دے۔
