مانچسٹر: کرونا وائرس کے سبب برٹش ایئرویز نے میلان کے لیے پروازیں منسوخ کردیں، گزشتہ روز سے اب تک ایئرلائن کی 22 پروازیں منسوخ کی جاچکی ہیں۔
اے آر وائی نیوز کے مطابق ایئرلائن انتظامیہ کا کہنا ہے کہ پروازوں کی منسوخی کا فیصلہ مسافروں کی حفاظت کے لیے کیا گیا ہے، اٹلی میں اب تک 400 افراد کرونا وائرس سے متاثر ہوچکے ہیں۔
دوسری جانب عالمی ادارہ صحت کا کہنا ہے کہ چین کے بعد سب سے زیادہ تیز کرونا وائرس اٹلی میں پھیلا، اٹلی میں اب تک 11 علاقوں میں وائرس پھیل چکا ہے۔
مزید پڑھیں: کرونا وائرس سے 5 لاکھ برطانوی شہریوں کی ہلاکت کا خدشہ
اٹلی کے تمام متاثر علاقوں میں عوامی مقامات، جامعات ایک ہفتے کے لیے بند کردی گئی ہیں، آسٹریا کا اٹلی کے ساتھ بارڈر بند کرنے پر بھی غور کیا جارہا ہے۔
رپورٹ کے مطابق یورپ بھر میں وائرس کے کئی کیسز سامنے آچکے ہیں، برطانیہ میں اب تک کرونا وائرس کے 15 کیسز سامنے آچکے ہیں، 7 ہزار سے زائد افراد کے ٹیسٹ کیے جاچکے ہیں۔
برطانیہ میں بھی وائرس کے خطرناک حد تک پھیلاؤ کا خدشہ ظاہر کیا جارہا ہے جبکہ گزشتہ دنوں میں ایک رپورٹ میں انکشاف ہوا تھا کہ برطانیہ میں 5 لاکھ افراد کے کرونا وائرس سے ہلاکت کا خدشہ ہے۔
