لندن: برطانوی فضائی کمپنی برٹش ایئرویز کے لاکھوں مسافروں کا ذاتی ڈیٹا نامعلوم ہیکرز نے چوری کرلیا۔
غیرملکی خبررساں ادارے کے مطابق برٹش ایئرویز کی ویب سائٹ پر سائبر حملے کے ذریعے گزشتہ دو ہفتوں کے دوران ہیکرز نے تقریباً چار لاکھ مسافروں کا ذاتی ڈیٹا چوری کرلیا۔
برطانوی فضائی کمپنی کے مطابق ہیکرز نے متاثرہ مسافروں کے اکاؤنٹس سے رہائشی پتہ، ای میلز، کریڈٹ کارڈ نمبر اور سیکیورٹی کوڈز سمیت دیگر معلومات چرائی ہیں۔
برٹش ایئرویز کے چیف نے مسافروں کا ڈیٹا چوری ہونے پر اسے کمپنی کی کوتاہی قرار دیتے ہوئے متاثرین سے معافی مانگی ہے، الیکس کروز کا کہنا ہے کہ وہ ڈیٹا چوری ہونے پرمسافروں سے معذرت کرتے ہیں۔
برطانوی فضائی کمپنی نے ڈیٹا چوری کے متاثرین کو معاملے سے آگاہ کرتے ہوئے متعلقہ بینکوں، کریڈٹ کارڈز فراہم کرنے والے اداروں اور متعلقہ حکام کی تجاویز پر عمل پیرا ہونے کی ہدایت کی ہے۔
ترجمان برطانوی انفارمیشن کمشنر کا کہنا ہے کہ مسافروں کے ڈیٹا چوری ہونے کی تحقیقات کی جارہی ہیں جبکہ متاثرین کمپنی کی جانب سے جاری ہونے والی ہدایت پرعمل کریں۔