The news is by your side.

Advertisement

بھارت: برطانوی خاتون سفارتکار کو راہ چلتے ہراساں کیے جانے کا انکشاف

چندی گڑھ: بھارتی شہر چندی گڑھ میں سینئر خاتون برطانوی سفارت کار کو ہراساں کیے جانے کا انکشاف ہوا ہے۔

تفصیلات کے مطابق بھارت میں غیر ملکی سفارت کار بھی محفوظ نہیں رہے، بھارتی شہر چندی گڑھ میں 60 سالہ خاتون برطانوی سفارت کار کو ہراساں کیا گیا۔

خاتون سفارت کار بدھ کی صبح کو ٹینس کھیلنے جا رہی تھیں کہ موٹر سائیکل سوار شخص نے انھیں جنسی طور پر ہراساں کیا۔

پولیس نے برطانوی سفارت کار کو ہراساں کرنے کی ایف آئی آر درج کر لی ہے، ملزم کی گرفتاری کے لیے سی سی ٹی وی فوٹیج سے مدد لی جا رہی ہے۔

خاتون سفارت کار چندی گڑھ میں برٹش ڈپٹی ہائی کمیشن میں تعینات ہیں، کمیشن کی جانب سے ایک بیان میں تصدیق کی گئی کہ ان کی شکایت پر ایف آئی آر درج کی گئی ہے، اور پولیس تفتیش شروع ہو گئی ہے۔

چندی گڑھ پولیس نے ایف آئی آر درج کرنے کے بعد اسے اپنی آفیشل ویب سائٹ پر بھی ڈال دیا، جس سے عام لوگوں کی بھی اس تک رسائی ہو گئی اور ہراسانی کیس میں خاتون سفارت کار کی شناخت بھی ظاہر ہوئی۔

واضح رہے کہ جنسی ہراسانی کیسز میں عام طور پر خواتین اور بچوں کی شناخت ظاہر نہیں کی جاتی، اور ایسے کیسز تک ویب سائٹ پر عام لوگوں کو رسائی نہیں دی جاتی، لیکن اس کیس میں اسے معمول کی ایف آئی آر کے طور پر اپ لوڈ کیا گیا۔

ایس پی کیٹن بنسل نے اس حوالے سے بیان میں کہا کہ ایف آئی آر ویب سائٹ پر اپ لوڈ نہیں ہونی چاہیے تھی، میں اس معاملے کو دیکھوں گا۔

Comments

یہ بھی پڑھیں