لندن: بھارتی میڈیا کی جانب سے مسلسل کیا جانے والا پاکستانی ایف 16 طیارہ گرانے کا دعویٰ ایک بار پھر جھوٹا ثابت ہو گیا ہے۔
تفصیلات کے مطابق اس بار پاکستانی ایف 16 طیارہ گرانے کا بھارتی دعویٰ ڈیفنس کے شعبے سے وابستہ برطانیہ کے انویسٹی گیٹو صحافیوں نے جھوٹا ثابت کرایا۔
بیلنگ کیٹ ڈاٹ کام پر شایع ہونے والی تحقیقاتی رپورٹ میں بتایا گیا ہے کہ جس تصویر کو ایف 16 طیارے کی تصویر قرار دیا گیا تھا وہ بھارت کے مگ 21 طیارے کی ہے۔
برطانوی ویب سائٹ بیلنگ کیٹ ڈاٹ کام کی رپورٹ میں دونوں طیاروں کے پارٹس کا تفصیلی تجزیہ کر کے بتایا گیا ہے کہ پاکستانی طیارے کی ساخت اور انجن کا خول بالکل الگ ہے۔
بیلنگ کیٹ کے انویسٹی گیٹو صحافیوں نے لکھا ہے کہ بھارتی میڈیا کی جانب سے ایف 16 طیارہ گرائے جانے کا کوئی بھی ثبوت موجود نہیں ہے۔
یہ بھی پڑھیں: بھارتی تجزیہ کار نے اپنی ہی فضائیہ کا پاکستانی ایف 16 گرانے کا دعویٰ رد کر دیا
برطانوی ویب سائٹ کے مطابق مار گرائے جانے والے طیارے کے جس ملبے کی تصویر دکھائی گئی ہے وہ مگ 21 طیارہ ہے۔
یاد رہے کہ دو دن قبل بھی ایک بھارتی دفاعی تجزیہ کار نے اپنی ہی فضائیہ کے پاکستانی ایف 16 گرانے کے بھارتی دعوے کو مضحکہ خیز قرار دے دیا تھا۔
بھارتی دفاعی تجزیہ کار نے بھارتی نجی ٹی وی چینل کے جنونی اینکر کو جواب دیتے ہوئے کہا تھا کہ دکھائی ہوئی تصویر میں طیارے کا حصہ مگ 21 کا ہے، اور جو انجن دکھایا گیا ہے وہ جی ای ایف 100 کا ہے۔
