لندن :برطانیہ کی حزب اختلاف کی جماعت لیبر پارٹی نے واضح کیا ہے کہ وزیراعظم بورس جانسن کو ہٹانے سے متعلق منصوبہ بنانے سے پہلے برطانیہ کو بغیر معاہدے کے یورپی یونین سے علیحدگی سے بچا جائے گا۔
تفصیلات کے مطابق لیبرپارٹی کی ایجوکیشن ترجمان انجیلا رینر کا کہنا تھا کہ لیبرپارٹی پہلے بریگزٹ کے حوالے سے برطانیہ کو درپیش خطرات سے بچا جائے گا جس کے بعد وزیراعظم کی برطرفی کے لیے کوئی قدم اٹھایا جائے گا۔
ایک سوال پر کہا کہ ہم چاہتے ہیں کہ اس بات کو یقینی بنائیں کہ بغیر معاہدے کے علیحدگی نہ ہو اور اس سے قبل ہم کچھ اور نہ کریں۔
دوسری جانب وزیراعظم بورس جانسن کا کہنا تھا کہ بریگزٹ کو اکتوبر کے بعد تک ملتوی ہونے سے بچانے کے لیے میں استعفی نہیں دوں گا۔
ان کا کہنا تھا کہ برطانیہ کو معاہدہ یا بغیر معاہدے کے یورپی یونین سے الگ ہونے کے لیے اقدامات کرنا پڑیں گے جبکہ پارلیمنٹ ایک ایسا قانون منظور کررہی ہے جس کے تحت اگر اراکین پارلیمان ان کے معاہدے کو منظور نہیں کرتے ہیں تو پھر انہیں بریگزٹ کی ڈیڈلائن میں توسیع کے لیے رجوع کرنا ہوگا۔