لندن : برطانیہ کے مسلمانوں نے امریکہ کے نو منتخب صدر ٹرمپ کو لندن آنے کی دعوت دی۔
تفصیلات کے مطابق برطانیہ میں مقیم مسلمانوں نے امریکہ کے نو منتخب امریکی صدر ڈونلڈ ٹرمپ کو لندن آنے کی دعوت دی، لوگوں کا کہنا ہے ٹرمپ جب بھی لندن آئیں مسجد اور گرد نواح کا دورہ کریں اور دیکھیں یہاں لو گ کس طرح رہتے ہیں، چاہے سکھ ہو یا مسلمان، کرسچن ہو یا یہودی یہاں سب اتحاد سے رہتے ہیں۔
انکا کہنا ہے کہ ٹرمپ کو سیکھنا چاہئیے کہ اچھے معاشرے کے قیام کیلئے اتحاد ضروری ہے، ٹرمپ امریکہ میں مسلمانوں پر پابندی لگانا چاہتے ہیں جو کہ تکلیف دہ بات ہے۔
یاد رہے اس سے قبل لندن کے میئر صادق علی خان نے بھی ٹرمپ کو لندن آنے کی دعوت دی تھی اور کہا تھا کہ وہ لندن آئیں اور ان کی بچوں، دوستوں، محلہ داروں اور دیگر مسلمانوں سے ملیں، اگر میں نے مسلمانوں کے حوالے سے ان کا ذہن تبدیل کر دیا تو مجھے خوشی ہوگی۔
مزید پڑھیں : صادق خان،ڈونلڈ ٹرمپ کو اسلامی تعلیم دینا چاہتے ہیں
صادق علی خان کا کہنا تھا کہ میرے جیسے ہزاروں مسلمان ہیں جو مغربی طرزِ زندگی اپنائے ہوئے ہیں اور وہ برطانوی شہری ہونے پر فخر بھی کرتے ہیں، میں ان سب کو ڈونلڈ ٹرمپ سے ملوانا چاہتا ہوں، تاکہ وہ حقائق جان سکیں۔
یاد رہے کہ ڈونلڈ ٹرمپ مسلمانوں کے امریکا میں داخلے پرپابندی کے بیانات دیتے رہے ہیں، نو منتخب امریکی صدر ڈونلڈٹرمپ نے دسمبر 2015 کو امریکا میں مسلمانوں کے داخلے پر پابندی لگانے اورامریکا میں رہائش پذیر مسلمانوں کی جانچ پڑتال سخت کرنے کا مطالبہ کیا تھا۔
