پاکپتن: صوبہ پنجاب کے ضلع پاکپتن کی تحصیل عارف والا میں ناشتے میں چائے نہ دینے پر بھائی نے بہن کی جان لے لی۔
اے آر وائی نیوز کی رپورٹ کے مطابق پنجاب کی ضلع پاکپتن کی تحصیل عارف والا میں بھائی کو چائے نہ دینا جواں سالہ بہن کا جرم بن گیا، چائے نہ دینے پر بھائی نے کلہاڑیوں کے وار کرکے بہن کی جان لے لی۔
پولیس کا کہنا ہے کہ لاش کو ضابطے کی کارروائی کے لیے اسپتال منتقل کردیا گیا ہے اور واقعے کی تحقیقات شروع کردی گئی ہیں۔
پولیس کا کہنا ہے کہ عارف والا کے نواحی گاؤں 40 ای بی میں بہن بھائی کو ناشتے میں چائے دینا بھول گئی تھی جس پر ملزم نے اپنی 25 سالہ بہن سمیرا کی جان لے لی۔
پولیس کے مطابق ناشتے میں چائے نہ ملنے پر بھائی بہن کے درمیان تلخ کلامی ہوئی جس پر بھائی طیش میں آگیا اور بہن پر کلہاڑیوں کے وار کرکے اس کی زندگی تمام کردی اور موقع سے فرار ہوگیا۔
پولیس کا کہنا ہے کہ واقعے کی تحقیقات کا آغاز کردیا گیا ہے ملزم کی گرفتاری کے لیے چھاپے مارے جارہے ہیں، ملزم جلد قانون کی گرفت میں ہوگا۔
