کوئٹہ : سابق ڈپٹی اسپیکر قومی اسمبلی قاسم سوری کے بھائی نے نو مئی کے واقعات کی مذمت کرتے ہوئے پی ٹی آئی اور سیاست سے علیحدگی کا اعلان کردیا۔
کوئٹہ میں پریس کانفرنس کرتے ہوئے قاسم سوری کے بھائی ہاشم سوری نے صحافیوں کو بتایا کہ نو مئی واقعات کی پرزور مذمت کرتے ہیں، میرے بھائی قاسم سوری بھی جلاؤ گھیراؤ کی سیاست پر یقین نہیں کرتے۔
ہاشم سوری نے کہا کہ میرے بھائی قاسم سوری 9مئی کے واقعات کی شدید الفاظ میں مذمت کرتے ہیں، ہم پرامن شہری ہیں، ہمیں سیاست میں نہ گھسیٹا جائے۔
انہوں نے کہا کہ 9 مئی کے بعد میرے بھائی بلال خان کو گھر سے گرفتار کیا گیا، میرا اور بڑے بھائی بلال خان کا سیاست اور پی ٹی آئی سے تعلق نہیں رہا۔
ان کا مزید کہنا تھا کہ حالیہ حالات و واقعات سے ہمارا پورا خاندان شدید کرب میں مبتلا ہے، نو مئی کے واقعات کی شدید مذمت کرتے ہیں اور ہم پاک فوج کے ساتھ ہیں۔
