لندن: برطانیہ میں چاقو سے حملہ کرکے لڑکی کی جان لینے کی کوشش کرنے والا درندہ صفت شہری گرفتار ہوگیا۔
غیرملکی خبررساں ادارے کی رپورٹ کے مطابق یہ واقعہ گزشتہ روز برطانوی دارالحکومت لندن میں پیش آیا جہاں پبلک ٹوائیلیٹ میں مبینہ طور پر 21 سالہ شہری نے اٹھارہ سالہ لڑکی پر تیز دھار آلے سے حملہ کرکے قتل کرنے کی کوشش کی۔ خاتون کے پیٹ اور گلے پر چاقو کے گہرے زخم آئے۔
واقعے کے فوری بعد ہی پولیس نے تحقیقات کا آغاز کیا اور ایک دن کے بعد ملزم کی گرفتاری عمل میں آئی۔ اسپتال انتظامیہ کا کہنا ہے کہ خاتون کی حالت انتہائی تشویشناک ہے۔ جبکہ پولیس حکام نے بتایا ہے کہ یہ واقعہ اس وقت پیش آیا جب پبلک ٹوائیلیٹ کے اطراف سناٹا تھا۔
لندن برج پر پولیس کی فائرنگ، چاقو بردار شخص ہلاک
سرکاری اعداد وشمار کے مطابق برطانیہ میں گزشتہ سال 7 فیصد چھری کے حملوں کے واقعات میں اضافہ ہوا ہے۔ خیال رہے کہ برطانیہ میں گزشتہ سال اپریل میں بھی 17 سالہ نوجوان چاقو کے متعدد وار کے باعث ہلاک ہوگیا تھا، مقتول جھگڑے کے دوران چاقو زنی کا شکار ہوا تھا۔
خیال رہے کہ برطانیہ میں بچوں کے حقوق کے کام کرنے والے کمشنر کی جاری کردہ رپورٹ میں بتایا گیا تھا کہ 10 برس سے 17 برس کی عمر کے ایسے 27ہزار بچوں کی شناخت ہوئی جو صرف انگلینڈ میں جرائم پیشہ گروہوں سے وابستہ ہیں۔
