ریاض : حج مبرور کے حوالے سے نیک خواہشات کا اظہارکرتے ہوئے سعودی سفیر نے لبنانی عازمین حج کو قرآن کریم اور گلاب کے پھول پیش کیے۔
تفصیلات کےمطابق لبنان میں سعودی سفیر ولید بخاری نے بیروت کے رفیق الحریری انٹرنیشنل ایئرپورٹ پر سعودی عرب جانے والے لبنانی عازمین حج کے دستوں کو الوادع کیا، اس موقع پر لبنان کے دارالافتاءمیں اسلامی اوقاف کے ڈائریکٹر شیخ محمد انیس اروادی اور متعدد میڈیا پرسنز بھی موجود تھے۔
سعودی خبر رساں ایجنسی کی جانب سے نشر کردہ بیان میں ولید بخاری نے کہا کہ خادم حرمین شریفین شاہ سلمان بن عبدالعزیز اور ولی عہد شہزادہ محمد بن سلمان کی ہدایات پر مملکت کی اولین ترجیح اللہ کے مہمانوں کی مکمل دیکھ بھال ہے تا کہ ان مہمانوں کو اعلی ترین خدمات فراہم کر کے ان کے لیے فریضہ حج کی ادائیگی کو حتی الامکان آسان بنایا جائے۔
ولید بخاری کے مطابق رواں سال دنیا بھر میں سعودی سفارتی مشنوں اور قونصل خانوں نے کامیابی کے ساتھ الکٹرونک ویزوں کا اجرا کیا،یہ پروگرام سعودی عرب کے ویڑن 2030 منصوبے کے ضمن میں ایک اہم پیش رفت ہے۔
سعودی سفیر نے لبنانی عازمین حج کے امور کو آسان بنانے کے واسطے بھرپور توجہ دینے پر لبنانی وزیراعظم سعد حریری اور دیگر عہدے داران کا شکریہ ادا کیا۔
ادھر شیخ محمد انیس اروادی نے مملکت کی جانب سے اللہ کے مہمانوں کے لیے پیش کی جانے والی خدمات اور سہولیات پر خادم الحرمین الشریفین اور سعودی ولی عہد کے لیے تشکر اور ممنونیت کا اظہار کیا۔
بعد ازاں سعودی سفیر نے لبنانی عازمین حج کے درمیان قرآن کریم کے نسخے اور گلاب کے پھول تقسیم کرتے ہوئے حج مبرور کے حوالے سے نیک خواہشات کا اظہار کیا۔
