لاہور: علامہ اقبال انٹرنیشنل ایئرپورٹ پر گولیوں سے بھرا بیگ ملنے کا معمہ حل کرلیا گیا ، ملزم کے خلاف مقدمہ درج کرکے تفتیش شروع کردی گئی ہے۔
تفصیلات کے مطابق کسٹم حکام نے بیرون ملک سے گولیاں غیرقانونی طور پر ساتھ لانے والے مسافر محسن نواز کو تحویل میں لے کر اس کے خلاف مقدمہ درج کرلیا۔ایف آئی آر میں مسافر کےخلاف ممنوع سامان کو ذاتی سامان کی آڑ میں لانے کی دفعات شامل کی۔
کسٹم حکام نے1969ء کسٹم ایکٹ کے مطابق مقدمہ درج کیا ہے ۔ذرائع کے مطابق مسافر محسن فیصل آباد کا رہائشی ہے اور گزشتہ روز پاکستانی پاسپورٹ پر پاکستان آیا تھا۔
محسن نواز کا کہنا ہے کہ وہ نشانہ بازی اور شوٹنگ کا کھلاڑی ہے اور اس کا کسی غیر قانونی سرگرمی یا کسی دہشت گرد تنظیم سے کوئی تعلق نہیں ہے۔ محسن نواز کے مطابق وہ فیصل آباد شوٹنگ کلب کا ممبر ہے اور اس نے تین کاٹن گولیوں کے بک کرائے تھے۔وہ گولیاں اپنے ساتھ اپنے کھیل کےلئے لے کر آیا ہے۔
یاد رہے کہ گزشتہ روزعلامہ اقبال ایئر پورٹ پر دبئی سے آنے والا مسافر گولیوں سے بھرا بیگ چھوڑ کر فرار ہوگیا تھا جس کے بعد کسٹم نے ملزم کی گرفتاری کیلئے چھاپہ مار ٹیمیں تشکیل دیں تھی۔
گولیوں سے بھرے بیگ کو جب کسٹم کی اسکیننگ مشین سے گزارا گیا تو تین بیگ میں سے 4600مکمل گولیوں اور800خول موجود تھے، کسٹم کے عملے نے بیگ کو ضبط کرکے مسافر کی تلاش شروع کردی تھی ۔
تینوں ہینڈ کیری میں شکار میں استعمال ہونے والی گولیوں کے خول لانگ رینج اور شاٹ رینج شامل تھے ۔کسٹم کے افسران سمیت سیکورٹی ایجنسی نے غیر ملکی ائیرلائن کے عملے سمیت افسران کو شامل تفتیش کرلیا تھا کہ دبئی سے کس طرح جہاز میں اسکینگ مشین کی موجودگی میں گولیوں سے بھرے بیگ پاکستان پہنچ گئے ۔
