نئی دہلی: بھارت میں بس اور ٹرک کے درمیان ہولناک تصادم کے نتیجے میں 19 افراد ہلاک ہوگئے۔
غیرملکی خبررساں ادارے کی رپورٹ کے مطابق بھارتی ریاست تامل ناڈو میں مسافر بس ٹرک سے جاٹکرائی جس کے نتیجے میں 19 افراد ہلاک اور 23 زخمی ہوگئے۔
مسافر بس بھارتی شہر کیرالہ سے بنگلور جارہی تھی، حادثہ تامل ناڈو کے اوانشی ٹاؤن میں پیش آیا۔
پولیس کے مطابق بس میں 48 مسافر سوار تھے، حادثے کے نتیجے میں 19 افراد موقع پر ہی دم توڑ گئے جبکہ زخمی ہونے والے افراد کو طبی امداد کے لیے اسپتال منتقل کردیا گیا۔
At least 19 people were killed when a bus collided with a truck in crash near Tiruppur, Tamil Nadu. https://t.co/Ngtb4U1O7d
— Twitter Moments India (@MomentsIndia) February 20, 2020
اسپتال انتظامیہ کا کہنا ہے کہ حادثے میں زخمی ہونے والوں میں خواتین اور بچے بھی شامل ہیں، بیشتر زخمیوں کی حالت تشویشناک بتائی گئی ہے۔
پولیس کا کہنا ہے کہ حادثے کی وجہ فوری طور پر معلوم نہیں ہوسکی ہے تاہم تحقیقات کا آغاز کردیا گیا ہے۔
رپورٹ کے مطابق بھارت میں ہر سال ایک لاکھ 10 ہزار افراد ٹریفک حادثات کے نتیجے میں ہلاک ہوجاتے ہیں۔
پولیس کے مطابق بیشتر حادثات خطرناک ڈرائیونگ، ٹوٹی پھوٹی سڑکوں اور پرانی گاڑیوں کی وجہ سے رونما ہوتے ہیں۔