ریاض: سعودی عرب میں زیر تعمیر جدید شہر(نیوم سٹی) کے ‘دی لائن’ پراجیکٹ پر کام کا آغاز رواں سال کے آخر تک ہوجائے گا، مملکت کے خودمختار ویلتھ فنڈ کے گورنر یاسرالرمیان نے یقین دہانی کرادی۔
عرب میڈیا کی رپورٹ کے مطابق گورنر یاسرالرمیان کا کہنا ہے کہ نیوم سٹی کے ایک بڑے منصوبے’دی لائن‘ کی تعمیر اس سال کے آخر تک شروع ہونے کی توقع ہے۔ ’دی لائن‘ ایک 170 کلومیٹر پر محیط کاربن فری اور شہری ترقیاتی منصوبہ ہے، ہمیں امید ہے کہ سال کے اختتام سے پہلے تمام منصوبوں کو حتمی شکل دیں گے۔
انہوں نے بتایا کہ رواں کے آخر سے ہی نیو سٹی کے مختلف منصوبوں پر کام کا بھی آغاز ہوجائے گا۔ سعودی عرب کے خودمختار ویلتھ فنڈ کے گورنر نے ان خیالات کا اظہار فیوچر انویسٹمنٹ انیشیٹیو انسٹی ٹیوٹ (ایف آئی آئی) کے زیر اہتمام ایک ورچوئل ایونٹ سے خطاب کرتے ہوئے کیا۔
یاسرالرمیان کا کہنا تھا کہ نیوم کے کچھ حصوں کی تعمیر پہلے ہی شروع ہو چکی ہے، سینڈا جزیرہ جس میں بہت سارے ریزورٹس اور گولف کورسز اور دیگر سہولتیں موجود ہوں گی۔
خیال رہے کہ نیوم سٹی سعودی ولی عہد محمد بن سلمان کےوژن 2030 کو مدنظر رکھ کر تعمیر کیا جا رہا ہے۔ منصوبے کا اعلان 24 اکتوبر 2017 میں کیا گیا تھا۔ اس کا کل رقبہ 26 ہزار 500 مربع کلومیٹر ہو گا۔ اس میں 468 کلومیٹر بحیرہ احمر اور خلیج عقبہ کا ساحلی علاقہ شامل ہے۔
یہ بھی ذہن نشین رہے کہ نیوم سٹی تین براعظموں کو ایک دوسرے سے جوڑے گا جس میں مملکت کے علاوہ اردن اور مصر کے علاقے شامل ہوں گے، اس جدید سٹی میں ہر طرح کی سہولتیں میسر آئیں گی۔
