The news is by your side.

Advertisement

اب سرکاری ملازمین کی پینشن میں بھی کٹوتی ہوگی

کراچی : وفاقی ادارے کے ریٹائرڈ سرکاری ملازمین کو بڑا دھچکا لگ گیا، سول ایوی ایشن ملازمین کی پینشن میں کٹوتی کا فیصلہ کیا گیا ہے۔

اس حوالے سے ذرائع کا کہنا ہے کہ سول ایوی ایشن اتھارٹی نے ریٹائرڈ ملازمین کی پینشن میں کمی کردی ہے۔ پینشن میں کمی ایگزیکٹو گروپ سیون کے ریٹائرڈ ایڈیشنل ڈائریکٹرز کی ہوئی ہے۔

ذرائع کے مطابق پینشن میں کمی کا فیصلہ سی اےاے کے بورڈ آف ڈائریکٹرز نے کیا، بورڈ اراکین نے پینشن میں کمی ڈائریکٹر جنرل خاقان مرتضی کی تجویز پر کی ہے۔

پینشن میں ہونے والی اس کٹوتی سے سینکڑوں ریٹائرڈ ملازمین متاثر ہوئے ہیں۔ ڈائریکٹر ایچ آر محمد نواز خان نے پینشن میں کمی کا آرڈر 25 جون کو جاری کیا تھا۔

ذرائع کے مطابق نوٹیفکیشن میں کہا گیا ہے کہ پینشن میں کٹوتی کا اطلاق پرانی تاریخ میں مارچ 2022 سے ہوگا۔ نئے آرڈر کے بعد ریٹائرڈ ملازم کی پینشن میں 30 ہزار روپے کی کمی ہوگئی۔

دوسری جانب متاثرہ ریٹائرڈ ملازمین کا کہنا ہے کہ قانون کے تحت ریٹائرڈ ملازمین کی پینشن میں کمی نہیں کی جا سکتی۔ پینشن میں کٹوتی پچھلی تاریخ سے کرنا بھی سراسر غیرقانونی عمل ہے۔

دستاویزی ثبوت کے باوجود ترجمان سی اے اے نے پینشن میں کٹوتی سے انکار کر دیا۔ اس معاملے کی وضاحت دیتے ہوئے ترجمان سول ایوی ایشن نے اے آر وائی نیوز سے گفتگو کرتے ہوئے کہا کہ ریٹائرڈ ملازمین کی پینشن میں کمی نہیں کی جارہی۔

Comments

یہ بھی پڑھیں