The news is by your side.

Advertisement

سول ایوی ایشن نے بیرون ملک سے پروازوں میں کمی سے متعلق نوٹم جاری نہیں کیا

کراچی: بیرون ملک سے آنے والی پروازوں کی تعداد میں کمی کے فیصلے سے متعلق این سی او سی کی گائیڈ لائن پر سول ایوی ایشن اتھارٹی نے نوٹم تاحال جاری نہیں کیا۔

اے آر وائی نیوز کے مطابق نیشنل اینڈ کمانڈ آپریشن سینٹر نے بیرون ملک سے پاکستان آنے والی پروازوں میں نمایاں کمی کا فیصلہ کیا تھا، این سی او سی اجلاس میں 80 فی صد انٹرنیشنل پروازوں کی بندش کا فیصلہ کیا گیا تھا۔

تاہم اس سلسلے میں سول ایوی ایشن اتھارٹی کی جانب سے تاحال نوٹیفکیشن جاری نہ کیا جا سکا، 5 مئی سے پروزاوں کی تعداد 20 فی صد تک محدود کرنے سے متعلق ایئر لائنز بھی لا علم نکلی ہیں۔

پاکستان آمد کے لیے ایئر لائنز، مسافر پروازوں کی بکنگ سے متعلق ابہام کا شکار ہیں، دوسری طرف مختلف ممالک کے مسافروں کو کرونا ٹیسٹ رپورٹ کے حصول میں مشکلات کا بھی سامنا ہے۔

خیال رہے کہ نوٹیفکیشن کے اجرا کے بعد ایئر پورٹس پر صرف 20 فی صد پروازوں کی لینڈنگ کی اجازت ہوگی، این سی او سی کے مطابق ایئر ٹریول پلان 4 اور 5 مئی کی شب سے 19 سے 20 کی شب تک مؤثر ہوگا، اس ٹریول پلان پر 18 مئی کو دوباہ غور کیا جائے گا۔

سی اے اے شعبہ ٹرانسپورٹ کی یکم مئی (آج) کی چھٹی بھی منسوخ کی جا چکی ہے اور ملازمین کو آج طلب کیا گیا ہے۔

گزشتہ روز این سی او سی نے فیصلے میں کہا تھا کہ کیٹگری سی ممالک کی فہرست میں کوئی تبدیلی نہیں کی گئی، پاکستانی پاسپورٹ ہولڈرز کو روایتی طریقہ کار کے مطابق استثنیٰ حاصل ہوگا، اور ان کو ملک کے سفر کی اجازت ہوگی، تاہم ملک میں داخل مسافروں کے لیے اسٹینڈرڈ ہیلتھ کو وِڈ پروٹوکولز پر عمل کیا جائے گا۔

Comments

یہ بھی پڑھیں