اسلام آباد: وزیراعظم عمران خان نے کورونا وائرس کے بعد پیدا ہونے والے صورتحال کے پیش نظر وفاقی کابینہ کے ارکان کو اسلام آباد سے باہر نہ جانے کی ہدایت کردی۔
ذرائع پرائم منسٹر ہاؤس کے مطابق وزیراعظم عمران خان نے کسی وزیر اور کابینہ اراکین کو دارالحکومت سے بغیر اجازت باہر جانے سے منع کردیا۔
وزیراعظم کی ہدایت پر تمام وزرا اور کابینہ اراکین اسلام آباد میں موجود ہیں اور کورونا وائرس سے نمٹنے کے لیے اٹھائے جانے والے اقدامات میں بھرپور حصہ لے رہے ہیں۔
وزیراعظم عمران خان نے موجودہ صورتحال کے تناظر میں وزرا کو ذیلی وزارت کے اداروں سے رابطوں میں رہنے کی بھی ہدایت کر دی ہے۔
ذرائع نے بتایا کہ غیر معمولی صورتحال پروزرا کو کوئی بھی ذمہ داری دی جا سکتی ہے اس لیے انہیں بیرون شہر جانے سے روک دیا گیا ہے۔
واضح رہے کہ پاکستان میں بھی کرونا وائرس کے مریضوں کی تعداد میں مسلسل اضافہ ہورہا ہے، صورتحال کے پیش نظر وفاقی اور صوبائی حکومتیں موثر حفاظتی اقدامات کر رہی ہیں۔
عبدالقادر پچھلے 8برس سے اے آر وائی نیوز میں بطور سینئر رپورٹر خدمات انجام دے رہے ہیں، آپ وزیراعظم عمران خان اور حکمراں جماعت پاکستان تحریک انصاف سے جڑی خبروں اور سیاسی معاملات پر گہری نظر رکھتے ہیں۔
