اسلام آباد : وزیر اعظم شہباز شریف کی زیر صدارت وفاقی کابینہ کے اجلاس میں 14 آئی پی پیز کے ساتھ نظرثانی شدہ معاہدوں کی منظوری دے دی گئی، جس کے تحت بجلی کی قیمتوں میں کمی ہو سکتی ہے۔
تفصیلات کے مطابق وزیراعظم شہبازشریف کی زیرصدارت وفاقی کابینہ اجلاس کا اعلامیہ جاری کردیا گیا ہے ، جس میں بتایا کہ کابینہ نے 14 آئی پی پیز کے ساتھ نظرثانی شدہ معاہدوں کی منظوری دے دی . نظر ثانی شدہ معاہدوں کی رو سے 14 آئی پی پیزکیساتھ بات چیت کی گئی، آئی پی پیز کے منافع اور لاگت میں 802 ارب روپے کی کمی کی تجویز منظور کی گئی۔
آئی پی پیز سے گزشتہ برسوں کےاضافی منافع کی مدمیں35ارب کی کٹوتی کی جائے گی، معاہدوں کے قابل اطلاق رہنے تک حکومت کو 1.4کھرب روپے کا فائدہ ہوگا۔
اس حوالے سے وزیراعظم نے کہا کہ آئی پی پیزکےساتھ نظرثانی شدہ معاہدےبڑی کامیابی ہیں، معاہدوں سےگردشی قرضہ ختم ہوگا،بجلی کی قیمت بھی کم ہوگی۔
وزیراعظم نے آئی پی پیز کیساتھ کامیاب نظر ثانی شدہ معاہدوں پر ٹارسک فورس کی تعریف کی۔.
اس کے علاوہ وفاقی کابینہ نےانسدادمنشیات ڈویژن کووزارت داخلہ،ہوابازی ڈویژن کووزارت دفاع میں ضم کرنے اور حکومت کی رائیٹ سائیزنگ کےحوالےسےتشکیل کمیٹی کی سفارش پر منظوری دی، انضمام کےبعدانسدادمنشیات ڈویژن وزارت داخلہ کےایک ونگ کے طور پر کام کرے گا۔
اعلامیے میں کہا کہ اینٹی نارکوٹکس فورس وزارت داخلہ کا ایک ملحقہ محکمہ ہوگا، اس انضمام سے انتظامی معاملات، تنخواہوں، دیگرآپریشنل خرچوں میں بچت ہوگی۔ اس انضمام سےقومی خزانے کو 183.250ملین روپے سالانہ کی بچت ہوگی۔
وفاقی کابینہ نےہوا بازی ڈویژن کی ڈیفنس ڈویژن میں انضمام کی منظوری بھی دی ، انضمام سےانتظامی معاملات،تنخواہوں،دفتری دیکھ بھال،دیگرخرچوں میں بچت ہوگی اور قومی خزانے کو 145 ملین روپے سالانہ کی بچت ہوگی۔