اسلام آباد : کیبل آپریٹرز ایسوسی ایشن کے چیئرمین خالد آرائیں کاکہنا ہے کہ پیمرا کچھ لوگوں کو فائدہ پہنچانے اور کیبل آپریٹرز کے معاشی قتل کے لیے ڈی ٹی ایچ کی نیلامی کرنے جا رہا ہے ۔
چیئرمین پیمرا کے ساتھ ناکام مذاکرات کے بعد خالد آرائیں کے دیگر کیبل آپریٹرز کے ہمراہ میڈیا سے بات چیت کر رہے تھے انہوں نے کہا کہ پیمرانے دو سال تک ڈی ٹی ایچ کی نیلامی موخر نہ کی تو کیبل آپریٹر احتجاج اور دھرنے کا حق محفوظ رکھتے ہیں۔
اُن کا کہنا تھا کہ چیئرمین پیمرا کا رویہ نہایت نامناسب تھا وہ دورانِ مزاکرات ہی واپس چلے گئے اور کیبل آپریٹرز کے مطالبات تسلیم کرنا تو کجا مکمل بات بھی نہیں سنی۔
یہ بھی پڑھیں : ڈی ٹی ایچ کے تین لائسنس نیلام کیے جائیں گے، ابصار عالم
کیبل آپریٹرز کے چیئرمین نے کہا کہ پیمرا نے کیبل آپریٹرز سے پہلے کیبل کی ڈیجیٹلائزیشن پر بھاری سرمایہ کاری کراوائی اور اب ان کے معاشی قتل کے لیے ڈی ٹی ایچ کی نیلامی کی جارہی ہے جس سے غریب کیبل آپریٹرز کا کاروبار ختم ہو کے رہ جائے گا۔
خالد آرائیں کا مزید کہنا تھا کہ کیبل آپریٹر بھارتی ڈی ٹی ایچ یا بھارتی مواد کے حق میں نہیں تاہم پاکستان ڈی ٹی ایچ کی نیلامی کو کم از کم دو سال کے لیےملتوی کیا جائے۔
